chosas necessarias, ütilas, plaschaivlas e perfin superfluas, scu quel chi serva da teater a quasi tuotta la preschaint' istorgia.
A quaist tuot contribuiva la circonstanza, cha Duonna Frasquita, la bella, lavoriusa, ferma e robusta Navarraisa, savaiva, volaiva e podaiva cuschiner, cusir, richamer, scuer, fer da pasticier, lavrer, fer our cul fier, tgnair pulizia in chesa, glüschanter la vaschella, masder la pasta, tesser, fer stinvs, chanter, suter, suner la guitarra, giover a chartas e milli otras chosas sainza fin. Ed al medem resultat contribuiva na main eir l'otra circonstanza cha barba Lucas savaiva, volaiva e podaiva diriger il mulin, cultiver l'èr, ir a chatscha, pas-cher, lavurer da falegnam, da farrer e da müreder, güder a sa muglier in tuottas las massarias da chesa, ler, scriver, fer quint etc. etc. Tuot que co, taschair da sieus indschegnas particulers e da sias abiliteds extraordinarias.
Per exaimpel: Barba Lucas adoraiva las fluors (similmaing a sia muglier) ed eira ün floricultur taunt expert, ch'el pervgnit a prodür nouvs exemplers a forza da stentusas combinaziuns. El avaiva qualchosa d'ingegneur natürel e det prova da quetaunt, construind üna praja d'ova, ün sifon ed ün aquadot, chi triplichaivan l'ova del mulin; el avaiva musso a suter ad ün chaun, domesticho üna serp e dresso ün papagal a clamer las uras seguond ch'ellas gnivan indichedas d'ün' ura da solagl, drizeda vi d'üna parait. Uschè clamaiva il papagal las uras cun tuotta precisiun perfin in dis da nüvel e durante la not.
