Da 1663–1690 ha Podestat Gion Berchter, fegl dil sura Mistral, scret en quei cudisch il datum dil batten e della creisma de ses figliols e figliolas. Da 1703 naven ha Scarvon Giachen Berchter, fegl dil Podestat purtau en sis battens, nua ch'el ei staus padrin.
Las pli biaras e las pli interessantas notizias derivan denton da P. Justus Josef Berchter, Subpriur della Claustra de Miister. A sias numerusas notizias, ch'el para de haver rimnau cun grondissima stenta biars onns ora, dat P. Justus il tetel sin pag. 34: ,,Berchterianische und andere Jahr Geschichten." Cun sia lavur po el haver entschiet 1723. Propriamein sutascrets ei P. Justus nigliu, mo ord fetg biaras notizias sur sia atgna personalitat e sur specialas, internas caussas della Claustra, sco era numnont Mistral Giachen Berchter siu tat, san ins concluder cun tutta segirezia, ch'el, P. Justus, seigi igl auctur de nies document — notizias biograficas ed apologia sur Mistral Giachen Berchter.
P. Justus Josef Berchter, Conventual della Claustra de Muster da 1697–1736, fuva frar de Scarvon Giachen Berchter ed aschia in dretg beadi de Mistral Giachen Berchter. El era perquei tuttavia bein enconoschents cun la historia e las relaziuns della familia Berchter. Che sias notizias merettien compleina renconoschientscha e cardientscha, quei domonda schon sia simpla, sincera moda e maniera el scriver; ch'el hagi priu exact e conscienzius cun sias notizias, quei muossan oravontut las numerusas, differentas fontaunas, ord las qualas el ha fatg ses liungs e serius studis. Mal, snueivel mal fa ei a nus, de stover numnar tontas ed aschi interessantas e per part voluminusas scartiras, las qualas ein ussa per grondissim donn della historia grischuna totalmein svanidas. Senza dubi ein ellas daventadas in'unfrenda dil berschament de 1799. Sin pag. 33 scriva P. Justus:
Die nahmen auss deren schrifften ich volgende Notata aussgenomen.
- 1. Ihr hoch Fürstliche Gnaden Augustin stöcklin Apt. († 1641)[1]
- 2. Ihr Fürstliche Gnaden Adalbertus de Medell Apt. († 1696)
- 3. Ihr Fürstliche Gnaden Adalbert de Funs Apt. († 1716)
- 4. R. R. P. Maurus Catharin Decanus zu Disentis. († 1696)
- 5. R. P. Fintanus Wimer (Widmer) geistlich im kloster Disentiss.
- (fuva frater 1662; morts suenter 1687.)
- 6. Auss denen alten tauff, und totten büochern der Pfarey Disentiss.
- ↑ Las remarcas ed ils millesis en parentesa havein nus mess vitier.
