—Magbuutan ako, minahal kong Lauro...
—¡Mao kanay labing tinguha ko kaayo!
kay ang kabuutan maoy makapadugang
sa imong kaanyag; unya may katarungan
ako pagtawag nimo: babaeng buutan,
babaeng sulondon, dalaga nga maugdang...
Busa, magbuutan, magbuutan ka gayud
kay kini mao da ang mahal hiyas; Salud,
nga way usa ka babae, hangtud karon,
nakatuman kaniya, inday, pag-amping:
tanan, naglapas; kay ang kasingkasing
sa babae, ¡lihok kaayo!... ¡masalaypon!
Na, kay magbuutan ka man, pulong mó,
¿tumanon mo kini? ¿Dili mabakak?
—Oo, tumanon ko gayud, Lauro kó...
—Na, ambi... usa ka halok, matam-is kong buwak...
..............................................
..............................................
..............................................
..............................................
❀❀❀
