E Chamues-ch traversa la nöblia,
Ils cavaliers, ils giasts da Guardaval;
Il contadin as ferma sün la via,
Salüda ümil il Signur d'la val
Ed in sieu cour giavüsch' a quel mantun
Da cavaliers totela perdiziun.
»O vus — el disch — »o glieud dell' arroganza,
Gianüra vstida be da saida, vlüd;
Be tres nos saung vivais in abbondanza;
D'rapina glieud, sün vossa fatscha spüd!
Vus cruderos, vos gnieu gnaro ars gio
Ed algordaunza pü nun restero!«
Il firmamaint da stailas milliera
Vo's populand; tranquilla ais la not;
Silenziusa ais la val; d'glümera
Be brilla Guardaval. Nel gnieu da frod
Ais avriaunza, baccanal, e gö,
Sco ogni not, lossü ais uschigliö.
II.
Il convivi.
Sün Guardaval ais festa granda,
Il rich Signur voul banketter,
Bgers chers amihs al faun ghirlanda
Ed ogniün so bain lapper.
