Tinuod gayud ang sulti ni Pari Irene: ang kuwestiyon sa
Akademya sa Kinatsila, nga dugay nang gipasaka, hapit na masulbad. Si Don Custodio, ang kugihan nga Don Custodio, ang
labing kugihan sa tanang mga “ponente” sa kalibutan, sumala
sa pulong ni Ben Zayb, nagtoon kaniya ug nagtibcok lamag
adlaw ug basa sa ekspediyenti ug pagahikatulgan na lamang niya
nga dili gihapon masulbad; sa sunod nga adlaw mobangon siya,
ug mao gihapon ang iyang buhaton, ug mahibalik na lamang
siya sa pagkatulog. Hilabihan intawon kabudlay sa alaut nga
ginoo, ang labing kugihan sa tanang “ponente” sa kalibutan . . .
Buot niya nga makapanaog siyag hukom nga makalipay sa tanan,
sa mga prayle, sa taas nga kawani, sa kondesa, kang Pari Irene,
ug sa iyang mga tinuhoang mauswagon. Nagpatambag na siya
kang G. Casra ug si Ginoo Pasta nakadugang na hinoon sa paglibug sa iyang ulo, human siya tagaig mga tambag nga nagkasumpaki ug dili mahimo; nagpatambag siya kang Pipay, ang
baylarina, ug kini, nga walay kalibutan sa butang nga gipatambagan kaniya, miyam-id lamang ug unya nangayo kaniyag kalim-ag lima ka pisos, nga aron kono gastohon sa paglubong sa
usa niya ka iyaan nga namatay sa kalit sa ikalima nang pagkamatay, kun sa ikalimang iyaan nga namatay, sumala sa iyang katin-awan nga gihatag, ug unya mihangyo pa gayud nga itudlo
ang usa niya ka ig-agaw nga maantigong mobasa, mosulat ug
motogtog sa biyolin nga luyoluyo sa buhatan sa Fomento, mga
butang kini nga dili gayud makatabang sa pagpahunahuna kang
Don Custodio ug usa ka paagi sa pagsulbad sa gumonhap nga
iyang giatubang.
Duha ka adlaw human nang mga hitabo sa Perya sa Kiyapo, si Don Custodio nagsugod dayon sa pagtoon sa ekspediyenti,