— Unsaong monumento?
— Wala ka diay mahibalo? Ang monumento alang kang pari Baltazar.
— Kinsa man kana si pari Baltazar? — Kinsa? Usa ka prayleng dominiko. Tungod niini, ang mga pari nagpaamut sa mga estudiyanti. Na, amut na ug tulo ka pisos kun upat ba, aron dili kita nganlan nga inot. Nga walay makaingon nga aron sa pagtukod usa ka Monumento napilit sila sa paggarnit sa ilang kaugalingong salapi. Na, Placideto, na, kay magapulos da kanimo kanang imong amut.
Ug ginuntan kining mga polonga sa usa ka kidhat nga hinungkanon.
Si Placido nahinumdum sa kaagi sa usa ka estudiyanti nga kanunay nga makalabang sa pasulit gumikan sa paghatag amut nga tulo ka pisos.
— Tan-awa, nahibalo ka? isulat ko gayud pag-ayo ang imong ngalan aron hikit-an dayon sa magtutoon. Ania tan-awa: Placido Penitente, tulo ka pisos. Oy, pamati diay: sulod sa napulog lima ka adlaw magsaulog sa iyang natawhan ang atong magtutoon sa Historia Natural. Nahibalo ka nga maayo kaayo kanang magtutoona? dili gayud mobadlis sa dili makatungha ug dili gayud mangotana sa leksiyon. Undo, maayo kining pahimuslan.
— Tuod no . . .
— Unsa, sa imong hunahuna, dih ba maayong tagaan nato ug inadlawan? Ang orkista nga atong gamiton kinahanglan nga dili maiwit sa orkista nga gipahoni ta sa magtutoon sa Fisica.
— Tuod.
— Unsa sa imong hunahuna, kon mag-amut kitag tagurha ka pisos, igo na kaha? Na, Placiding, ikaw ang una paghatag, buahan ikaw usab ang mag-una sa lista.
Ug tungod kay nakita man niya nga si Placido mihatag dayon sa duha ka pisos, iyang giingon:
Pamati, hatag upat ka pisos, kay iuli ko kanimo unya ang duha; buhaton ko lamag kati-an.
— Kon imong iuli kanako, ngano pa man gayud nga mohatag pa ako kanimo? Igo na nga imong ibutang sa lista ang upat ka pisos.
