This page has been proofread.
82 ........................... VISIONS
- L'in s'ièfe hureux, contint de s' veine,
- D'zous ses écus joïeux d' ploïer
- Et ch'tiot boutiquier sins trop d' peine
- Compt' cheux qu'il a b'soin pour païer.
- A s' ferniète l' fille amoureuse
- S'avainch' pour êtt' vue et pou l' vir,
- Près d' sin malate l' gins doreuse
- Attind ch' méd'cin trop long à v'nir.
- Pa l' route débuquaint de l' vallée
- Arriv't chés voitures d' rouliers
- Att'lé' d' quatt' bons qu'vaux d'affilée
- Tiraint au lourd à pleins colliers.
- Queuq' grainn' diligine', queuq' calèches,
- Et cabriolets n' font qu' passer,
- Eun' patacbe aveuc chés dépêches
- Roul' d'in train à tout rinverser.
- Bintôt v'là ch' laitier dins s' carette,
- L' marchainde d' burre et d' fromach' mou,
- Chés vindeux d' légum' à brouette,
- Ch' coconnier qui cri' comme in fou.
- Vêtus d' bourgerons et d' rouières,
- Chés homm' s'in vont à ch's ateliers
- Pou leu traval chés ouvrières
- Fil't in cotrons et tabliers.
- Tertouss aussitôt ch' l'heur' sonnée
- S' press'tent d'intrer sins s'attarger
- D'sireux d'imploïer leu jornée
- Pou ch' maîte et gaigner d' quoi mainger.