This page has been proofread.
- 80 ........................... VISIONS
- Car quind ch' démon crie et s'importe,
- N'a qu' chés daimnés qu'in pâtiront,
- Mais s'y busi' ch'est pour eun' sorte
- Qu' longtimps chés homm' se r'sintiront.
- Comme ch' vint qui soufflot l' timpête
- A s' volonté s'avot éteint,
- Ch' solel qu' minchot à moutrer s' tiête,
- Ch' ciel s'éclairot, ch'étot l' matin.
- Aux alintours, des monts d' nuées
- S' muchot't d'rière ch' l'horizon,
- Y n' restot pus qu' queuq' tiott' buées
- Copronnaint chés qu'miné' d' mason ;
- A vir dins chés abes l' feuillache
- R'preinne s' couleur et s' position
- Et d'acouter l' joli ramache
- D' tous chés osiaux d' la création,
- In sintot d'jà qu'après l' déroute
- Et ch' tahu qui v'not d'tout percher,
- Ch' solel pompaint d' qu'à l' dernièrr' goutte,
- Eun' bell jornée allot qu'mincher.
- Et, d'in haut l' ville, à perté d' vue
- Bâti' d' pierres, d' briques, d' limon,
- Copée in deux par eun' grainn' rue,
- S' révillot sous l'œul de ch' démon.
- Comme eun' tapé' d' tiott' cloq' d'église
- S' mettot't à sonner l'Aingelus,
- Ch' diape intindaint ch' son qui l' défrise,
- Jure in cop in fait d'oremus,