[᭓᭒ 32B]
᭓᭒
ᬦᬶᬂᬳᬢᬶ᭞ᬯᬶᬭᬾᬄᬢᬢᬸᬚᭀᬦᬾᬧᬱ᭄ᬝᬶ᭞ᬓᬫᬸᬓ᭄ᬢᬶᬧᬤᬫᬦᬸᬚᬸ᭞ᬫᬶᬭᬶᬩ᭄ᬲᬸᬩᬦᬾᬬᬲᬶᬦᬄ᭞ᬳᬃᬣᬶᬦ᭄ᬕᬮᬦᬾᬲᬸᬚᬢᬶ᭞ᬦᬾᬧᬫᬸᬧᬸᬢ᭄᭞ᬫᬸᬕᬶ
ᬘ᭄ᬦᬶᬂᬫᬗ᭄ᬕᬶᬄᬩᬕ᭄ᬬ᭟ᬫᬶᬭᬶᬩ᭄ᬳᬤᬓᬕᬸᬡᬳᬦ᭄ᬜ᭞ᬬᬦᬶᬂᬩᬧᬫᬦᬸᬢᬸᬭᬶᬦ᭄᭞ᬳᬶᬦ᭄ᬤᬶᬓ᭄ᬫᬸᬲᬸᬳᬾᬤᬶᬭᬕ᭞ᬳᬶᬲᬤ᭄ᬭᬶᬧᬸᬢᭀᬓᬤᬦᬶᬦ᭄᭞ᬫᬸᬲᬸᬄᬦᭂᬫ᭄ᬦᭂᬫ᭄
ᬤᬳᬢ᭄ᬰᬓ᭄ᬢᬶ᭞ᬤᬸᬯᭂᬕ᭄ᬗ᭄ᬮᬶᬮᬶᬢ᭄ᬫᬦᭂᬕᬸᬮ᭄᭞ᬦᬗ᭄ᬳᬶᬂᬲᬤᬸᬭᬸᬂᬜᬢ᭄ᬯᬬᬂ᭞ᬩ᭄ᬘᬶᬓ᭄ᬓᬕᬸᬦᬸᬂᬫᬮᬮᬶ᭞ᬲᬫ᭄ᬩᬶᬮ᭄ᬦᬸᬯᬸᬃ᭞ᬥ᭄ᬬᬄᬳᬤ᭄ᬭᬶᬚ᭄ᬕᬾᬕ᭄ᬜᬮᬂ᭟᭜᭟ᬧᬸᬧᬸᬄᬳᬤ᭄ᬭᬶ᭟
ᬤᬸᬄᬳᬶᬦᬦᬓ᭄ᬳᬤ᭄ᬭᬶᬘ᭄ᬦᬶᬂᬳᬬᬸ᭞ᬲᬗ᭄ᬓᬦ᭄ᬩᬧᬧ᭄ᬭᬧ᭄ᬢ᭞ᬩ᭄ᬮᬶᬦ᭄ᬘ᭄ᬦᬶᬂᬫᬶᬮᬸᬗᬶᬭᬶᬂ᭞ᬫᬶᬲᬤ᭄ᬬᬫᬓᬃᬱᬢᬸᬮᬸᬂ᭞ᬧᬂᬗᬶᬭᬶᬂᬳᬶᬦᬦᬓ᭄ᬫᬸᬧᬸᬄ᭞ᬩ᭄ᬮᬶᬦ᭄ᬘᭂᬦᬶᬂᬲᬂᬲᬶᬲ᭄ᬬᬯᬦ᭄᭞
[᭓᭓ 33A]
ᬤᭀᬢ᭄ᬫᬶᬋᬂᬢᬢ᭄ᬯᬲᬤ᭄ᬭᬶᬧᬸ᭞ᬳᬧᬂᬬᬲᭂᬍᬕ᭄ᬫᬶᬋᬗᬂ᭞ᬫᬸᬕᬶᬘ᭄ᬦᬶᬂᬫᭀᬮᬶᬄᬲ᭄ᬮ᭟ᬦᬸᬦᬲ᭄ᬮᬸᬕ᭄ᬭᬢᬶᬢ᭄ᬬᬂᬰ᭄ᬭᬶᬫᬳᬳᭂᬫ᭄ᬧᬸ᭞ᬩᭂᬲ᭄ᬩᬗᭂᬢ᭄ᬧᬲ᭄ᬯᬾᬘ᭄ᬙ᭞ᬚᬦ᭄ᬢᭀᬲ᭄ᬧ᭄ᬭ
ᬡ᭄ᬥᬗᬭᬯᬸᬳᬶᬦ᭄᭞ᬭᬶᬂᬧᭀᬦ᭄ᬤᭀᬓ᭄ᬢᬶᬢ᭄ᬬᬂᬳᬶᬚᬸᬕᬸᬮ᭄᭞ᬲᬢ᭄ᬫᬓᬳᬫᭂᬃᬣᬭᬸᬦ᭄ᬢᬸᬄᬤᬕᬶᬂᬯᬲᬦᬦ᭄ᬲᬂᬢᬧ᭞ᬧᬸᬧᬸᬢ᭄ᬢᬶᬢ᭄ᬬᬂᬫᬗ᭄ᬮᬸᬗ᭄ᬲᬸᬃ᭞ᬤᬸᬭᬸᬲᬂᬯᬘᬦᬾ
ᬦ᭄ᬢᬶᬢ᭄ᬬᬂ᭞ᬲᬋᬂᬳᬶᬩ᭄ᬮᬶᬲᬶᬱ᭄ᬬᬯᬦ᭄᭟ᬤᬸᬄᬲᬶᬱ᭄ᬬᬯᬦ᭄ᬘ᭄ᬦᬶᬂᬦᬦᬓ᭄ᬩᬕᬸᬲ᭄᭞ᬚ᭄ᬮᬳᬦ᭄ᬬᬓᬯᬶᬢᬶᬦ᭄ᬩᬧᬦ᭄ᬚᬦᬶᬫᬦᬸᬢᬸᬭᬶᬦ᭄᭞ᬤᬕᬶᬂᬦᬾᬫᬤ
ᬦ᭄᭞ᬲᬤ᭄ᬭᬶᬧᬸ᭞ᬫᬸᬲᬸᬄᬦᭂᬫ᭄ᬦᭂᬫ᭄ᬢ᭄ᬕᭂᬲ᭄ᬳᬶᬧᬸᬦ᭄᭞ᬫ᭄ᬮᬄᬚᬦᬶᬩᬧᬜᬃᬘ᭄ᬙ᭞ᬫᬗ᭄ᬤᬲᬫ᭄ᬧᬸᬦ᭄ᬘᭂᬦᬶᬂᬩᬶᬗᬸᬂ᭞ᬲᬗ᭄ᬓᬦ᭄ᬳᬧᬶᬓᬶᬦ᭄ᬫᬶᬋᬗᬂ᭞ᬳᬧᬂᬲᬓᬶᬂᬲ᭄ᬓᭂᬦ᭄ᬩᬦ᭄ᬩᬦ᭄᭟
Page:Bali-lontar-gaguritan-janmaprawreti-01-350ppi.pdf/33
This page has been proofread.
