57. Sadhǎdjă tanto padă ngaghǎli, djha' tèngka ghellǎ' tadǎ' saèna, la-mala tjoma njossaè, sareng makasta ongghoe; diboeḍina tanto kapangghi, băbăles tètèngkanna, sèksana sè Aghoeng, Ghoestè Alla sè kabăsa, karana è kora'an ampon kalahèr, djhǎ' manossa èlarang.
58. Ta' kèngèng norot napso tapatè, kodhoe onèng ngokor tatedḍhănna, tjegghǎ ongghoe ka băbinè', maèn èngghi djhă' lèboer, laranganna sara' sènglaè, pasèra sè alompa', kasta ampon tanto, băbălessa tanto tèbhă, lekkasa abidhă ampon tanto mangghi, bhoektè kadhi Dhin Sora.
59. Mèla sèjang malem kaèmotè, manossa ta' ontong saabiddhă, sè soghǎ' pas roghoe retto, sè oḍi' maso' kabhoer, sè dhoeghǎghes segghoet pas gherring, bhoektè kadhi Dhin Sora, dhăddhina kong-markong, sossa pèkkèr gherring bhădhăn, sè asalla terro ngoboeghǎ ka langngè', pas odi' ta' paarghă.
60. Sèla sapnèka ghi' ètambăi, kasossa'an dări kamèskènan, malaratta langkong-langkong, tor ta' kèngèng pansijoen; djhă' sènga abă'na tè-ngatè, adjăgă dări asal, kasta ta' bhingong, naddjhăn ta' bărăs bhădhănna, tanto ḍhă'ăr angghoejjă ta' ré'tabéré', amè' bădă sennengnga .
SALANGET
61. Salangèt dhăddhi panjambhoeng, njambhoeng parèngettan saè, maènga' sè korang akkal, korang akkal korang pèkkèr, mèkkèrè bhab kasennengngan, kasennengngan saè bhersè.
62. Bhersè taḍă' èkabhingong, bhingong ka sè njalekkoè, slekko marghǎ korang teḍḍha, korang teḍdha korang tèngel, tètèngèl kodhoe bàn obăng, obăng sè maajem orèng .
63. Sèra sè ta' poron bhingong, mastèna kodhoe tè-ngatè, larangan djhǎ' kantos lompa', madhăt nakal maèn malèng, lamon orèng onèng njegghă, karèkongan ta' èpangghi .
64. Ta' kasta sareng ta' rèkong, manabi orèng ngastètè, sadhǎdjăna èbhăng-tèmbhăng, noro' pètotoran saè, pangaterro djhă' èlorbă, amè' pas lèboer mamalèng.
65. Orèng sè sapnèka klèro, terro senneng mangghi aib, kakareppan ta' katekkan, nèspa birăng sè èpangghi, sè kalakon sapanèka, na’-kana' kodhoe ngèngettè.
66. Naddjhăn pardjadji sè aghoeng, ta' mohal poron mamalèng, bănnè malèng ngètjo' obăng, njebbroet bhărăngnga rèng doemè', tapè ngètjo' ètèra'na, sè ta' kappra njama malèng.
67. Ghǎpnèka kodhoe ètemmo , paghoe-ongghoe sè ngaghǎli, dhaddhi prèngettan sè ngarang, ka pèkkèrra kana' kènè', tè¦ tèmbhăngan satowana, saamponna negghoe' bislit.
