13
II.
Mga Karaang Manggi-alamon
——
Bisan tu-ud nangatawo sa kaburóng ug ang ilang pagpauglibok pulós kinara-an; bisan sa ilang lawas maó ra gayúd ing ginasul-ob ang sininang pinagahi ug sa ilang mga ti-íl walá gani makatiláw ug sapín, si Kapitán Jantoy ug Kapitán Awíng, maóy mga tawo nga, lahí sa kadaghanan sa mga karaan, may mga bag-ong hunahana. Silá nangandoy sa kagawasán sa atong lungsud; gi-ilá nila nga ang pamantala-an maoy masigang sugá sa kauswagan, ug ilang ginatoho-an nga ang labíng bilí-hong bahandi nga ikabilin sa mga anák, dili ang salapi nga mahurót, kung dili ang waláy pagkahubás nga bahandi sa kinaadman.
Bisan walá gani sila makabaktas sa dagat nga naga-uláng ning Sugbo sa ubang pulo, silá nanga sayud sa lakat sa Kalibutan; ilang nahibaloán nga sa usa ka dapít niiní, may sulondong lungsud nga maskig gamáy uyamut, na-antigong misanta sa paghasmag sa usá ka dakú ug makagagahum nasód nga niadto bu-ót mo-ilog sa kagawasan, ug ilang nasayran nga kadtong gamayng lungsura nakahimo sa iyang gibuhat, gumikan lamang sa gahúm sa kaalam sa iyang mga pumúpuyó.
