11
I.
SIDING UG LEON
——
Waláy bisan kinsang nahibuloig niadtong ilang paghigugmaay. Sa gagmay pa silá, daan nang gibanábana sa kadaghanan nga ang ilang mga kasingkasing babalíktuson gayud sa bulawanong talikala sa gugma.
Ang mga ginikanan ugód nila, ang duhá ka bugtong dato sa lungsud sa Sahagon, nanagsinándurutáy man kaayo sukád pa sa hataás nang panahon, ug silá, si Sidíng ug Leon, mga binuhat nga binutangán ni Bathalag malumóng kasingkasing, daan nang naanad, gikan pa sa pagkabata, sa pagduyog sa ngatanán: sa mga duladula ug hilak.... Ug, dayág na lang, sa pag-abút nila nianang panahon nga ang kinabuhi sa tawo mapunó sa mga damgong pinulog, nga sa dughan motóktok mga katingalahang pagpanglabtik, ug nga, sa dili masabút, ang baba usahay mopahiyúm ug ang mga matá mopatulo sa mga luha, sa pag-abut nila nianang panahona—¡tingbulák sa kinabuhi!— sa kasingkasing miturók ang gugma, kanáng pagbati nga mohalili sa pagbating binata: gugmang matahúm sa ginadamgo sa mga Magbabalak, dakú ingón sa langit ug walay katapusan, sama kang Bathala....
