An padi, kay waray na pakakaantos han mabug-at nga mga kamot nga nanhihiduon ha iya mga sugbong, nanalinguha hin pagbaton:
Nagsasayop ka; waray ko binuhat nga ano man han imo amay!
—Waray?— sinmiring an batan’on ngan dinun’an ha sugbong tubtob han paghipaluhod.
—Waray, tuod la ha akon! An akon lugod sinundan, hi P. Damaso ....
—Aah! ngayan!—nakasiring an batan’on dagos buhii ngan dumapi ha agtang. Katima, bayaan an makaluluoy intawon nga Fr. S'alvi, napasingadto hin dagmit ha iya balay.
Igo man nga naabot na an suruguon, tinabagan an prayle nga makabuhat.
Adto nga lagas nga nasahi han iba naglilinakat ha kakalsadahan hin waray la tadong.
Usa hiya nga tawo nga hadto nagtuon hin Filosofia, kundi waray pagtapos han iya pag-aram tungod han pagalagad han iya tigurang nga iroy, diri tungod hin kakulang hin katigayunan, diri man liwat tungod hin kawaray sarabutan: an nasugaran tungod kay hi iya nanay damo in salapi ngan hiya ibinabantog nga maupay in ulo. An tigurang nga iroy nahadlok nga an iya anak magmakinaadmananon hin duro ngan mahangalimot han Dios, salit iya pinapagpili kun hain hiya han kapadi, o pag-iwas lugod, tibway, dida han Colegio ni San Jose. Hiya kay may ada pinangungulitawhan, say pinili an urhi ngan pumakasal. Balo ngan ilo ha sakob hin usa katuig, namiling hin kaliawan dida han mga basahan, unay paglikay han mga kasamdong, han bulang ngan han kabagos. Kundi nahanayak nga uraura han mga pagturun’an ngan han pagpinamalit han mga basahan nga waray na pagsigapno han iya mga sinunod nga mga kalugaringon, salit nagtikakablas hin hinayhinay.
Tinatawag hiya han mga mag-aram kan D. Anastasio, o Pilosopo Tasyo; kundi an waray mga hibabruan, nga asya an kadak’an nagngangaran ha iya kan Tasyo an Buang, tungod han iya panhunahuna nga nasahi han kanan iba
