22
na”, kundi napugngan niya ngan inin masunod an pinamulong: —Kaginuuhan, ayaw la kamo hipausa hiton kinag-anak nga pamulong ha akon kinin amon hadto anay padi, kay amo ito an iya ha akon hadto pagdara han gutiay pa ako, kay ha kan Fr. Damaso kawang la an pagpanlabay han mga tuig; kundi iginpapasalamat ko ini ngatanan ha iya kay nakakapahanumdom ha akon hin buhi hadto nga mga adlaw han hiya masukot pa lumaoy ha amon balay ngan danay mag-ilob pagsaro ha amon hin pangaon. An dominiko kinmalit pagsiplat han pransiskano nga nakibig na an lawas. Hi Ibarra binmuhat ngan mamulong: —Tuguti ako niyo nga mag-una tungod kay pag-aabot ko pa la ngan tilakat ako buwas ngahaw, damo pa yana akon mga turuhayon nga inaatubang. An kadak’an han panihapon natima na, diri ako makiirinmon ngan diri ako naayon hin kape sugad man hin siminte. Ngatanan igpahanungod ta gihapon han Espanya ngan Pilipinas. Ngan tinay-ong niya in usa kakopa nga irinmon nga ngada hadto waray pa niya paglalabti. Sinubad hiya han tigurang nga tenyente hin waray yakanyakan. —Ayaw anay paglakat!-—hinuringan hiya ni Kapitan Tiyago. —Diri maiha maabot hi Maria Clara; kinadto ni Isabel pagkuha. Makanhi an bag-o nga padi didto ha iyo nga usa nga banal nga tawo. —Makanhi na la ako liwat buwas han aga ugsa ako lumakat! Yana may ada ko kakadtuon nga kasuruk’an gud. Ngan lumakat. Sinmunod man an pransiskano pagpahungaw han iya kasinahon. —Inmabat ka? — inatubang an mabulaw nga batan’on iya iginwawaay an sipol nga garamiton ha postre. —Adto, pagpalabilabi! Diri na mahihimo ipanagmugo han padi! Nagpapakasiring na nga tuhay na nga mga tawo! Asya ito an inaabutan han pagpagikan han kabataan ngadto ha Eu ropa! Angay ito igdiri han Gobyerno! —Ngan an tenyente? —sinmabat hi Da. Victorina han pransiskano; —han bug-os nga gab-i waray gud ukoy pagkinuriot; maupay na gud nga linmakat! Lagas na tenyente la gihapon! Waray hingangalimot an ginang han paghinabihi han iya mga pakurong ngan han paghitamaki han sidsid han iya luon.
