Inmulpot ini dayon.
—Senyor Alcalde, —ginsiring han paglagos,— basi paghirot nga hanabo pa in sugad han hintambungan ni V. E., hinabo nga ikinasasakit ko tungod kay nakakaraot han dungog han Gobierno ug han ngatanan nga kakatsilaan, igintutugon ko ha imo hin tinuod hi Go. Ibarra, diri la nga matagan mo han ngatanan nga ipakasasayon niya paghuman han iya mga panalinguha, kundi sugad man, mahirutan nga tikang yana pagsamukon hin bisan hino nga tawo hin bakay ano la nga hipatungdan.
An Alcalde sinmabot hadto nga tugon salit tinmamod pagtago han iya kaawod.
—Ngan patugunan man liwat ni V. E. an alperes nga namumuno han mga sundalo dinhi ngan usisahon mo kun matuod ba nga ini nga punuan may ada binubuhat nga gawas han iya mga turumanon: kapin hin usa an mga sumbong nga akon nabati mahatungod hini nga bahin.
Linmagos hi Kapitan Tiyago, tikig ngan mahamis an pamanapton.
—Don Santiago,— ginsiring ni S. E. hin maaghop nga tingog. —adto pa la ako paghihingyap ha imo hin lunlon la kalipayan tungod han imo palad kamay-anak nga sugad kan Senyorita de los Santos; yana ighihingyap ko ha imo an ngatanan nga kahimyangan tungod han imo maurumagad; an labi kadarayawon nga anak, waray ruhaduha, angay ipadis han labi kamaupay nga bungtuhanon ha Pilipinas. Mahimo ta paghibarui kun sano an pagkasal?
—Senyor!... — nag-imakayayakan hi Kapitan Tiyago ngan namahid han balhas nga manlambiyog ha iya agtang.
—Asya, naabat ako nga waray pa ginkahumanan nga sabot! Kun magkulang hin maluhod, ikalilipay ko nga magin-usa ako ha ira. Unay ko pagpahimayad han kadam'an na nga diri ko ayon nga kinasal nga akon na linudhan!—nagsiring, inatubang an Alcalde.
—Oo, senyor!—binmaton hi Kapitan Tiyago nga hinmiyom hin makapapaid.
Hi Ibarra haros nagdadalagan ngadto pamiling kan Maria Clara damo an iya isurumat sugad man an ira himangrawon. Nakabati hiya hin magtam-is nga tingog gumikan didto hin usa nga sulod, salit nagtawag hiya hin hinayhinay ha purtahan.
