16
Iginkakilala ko hiya ngan iginkahiruhimangraw ug makakasiring ako nga usa hiya han mga tawo nga labi kadungganan ug kadarayawon dinhi ha Pilipinas. —Seyor,—binmaton hi Ibarra, dapit naamdok; — iton imo pagdayaw han akon amay nakakapapas han akon mga ruhaduha mahatungod han iya nagin-kapalaran, nga ako nga anak diri pa maaram kun ano. An mga mata han tigurang napuno bin luha, salit binmirik ngan pumaharayo. An batan’on inmabat nga nag-uusaan na la hiya ha butnga han ruwang; tungod kay an tagbalay nawara, waray niya kinikita nga sadang ha iya makagpakilala han kadaragan’an nga an kadam’an ha ira nagsisiniplaton ha iya hin tutok. Katima niya uruon hin pira kadali, naglabot hiya ha ira hin huyayag nga kaburut’on: —Tuguti ako niyo, — nagsiring, — nga magtalapas han mga lagda han katalahuran. May pito na katuig tikang ako nagikan dinhi ha aton tuna nga yana, ha akon pagbalik diri ako makakahimo hin diri pagsaurog han labi niya kamakawiwili nga rayandayan; an iya kababayin’an. Tungod kay waray man may nagpasipara hin pagbaton, napirit na la an batan’on hin pagpahirayo. Dinaop niya in usa nga alirong hin kalalakin’an nga han pakakita han iya pagtiharani magbuhag ha may dapit ha iya. —Kaginuuhan, — an pulong niya; —ha Alemanya may batasan nga kun in usa nga diri kinikilala nahangangadto hin usa nga titirok ngan waray ha iya didto nagpapakilala han iba, hiya la ngahaw in nagsusumat han iya ngaran pagpakilala ngan binabaton na la hin sugad ngahaw han iba. Tuguti ako niyo hini nga batasan, diri kay pagdara nganhi han hin-aaraan !han mga tagalaintuna, kay an aton lugaringon maupay man liwat, kundi kay waray ko iba yana nga sadang pagsundan. Nagsaurog na ako han langit ngan han kababayin’an han tuna ko nga natawhan; yana karuyag ko magsaurog han mga taghimungto, han akon mga kadugo. Kaginuuhan, ako hi Juan Crisostomo Ibarra ug Magsalin! An iba namagpakilala han ira mga ngaran; may ada may mga kahulugan, may ada man dapit daan na mga kilala. —An ngaran ko hi A--------- a!— nagpakilala in usa nga batan’on hin mamara nga tingog, dinmuko hin gutiay.
