ako; asya ini an patakas nga rakya, an hinurubgay, dapit pagbagi han mga pagharoy naton ngatanan!
—Sayod ka man nga uyon ako ha imo, — binmaton hi D. Filipo dapit nahimuot, dapit man liwat nahiyom. — Inmugop ako han imo panalinguha, kundi ano in mabubuhat ko nga natipa ha akon an gobernadorsilyo ngan han padi?
—An pag-iwas ha katungdanan,— tinmigda an pilosopo ngan pumaharayo.
Hi D. Filipo nahapaudong na la ngan dagos pagsinunura hin kita han tigurang.
—Pag-iwas! —nagnginurutob tipakadto ha singbahan, —pag-iwas! Oo, kun ini nga kakatungdanan usa nga nakakapadungog, diri usa nga nakakabug-at, oo, maiwas ako!
An libong han singbahan puno hin tawo: babayi, lalaki, bata, tigurang, nga nanul-ot han ira gimag-uupayi nga dugnit, nagkakasarusalakot, namamagsulod-guwa dida han haligot nga agianan. Namamarag in pulbura, bukad, insiyenso ngan talamhot; mga luthang, kuwitis ngan mga siyutsiyot(6) nakakapadalagan ngan nakakapaguliat han kababayin’an ngan nakakalipay han kabataan. May uusa nga banda hin musika nga nagtitinuktok ha tungod han kombento, may pipira man nga nagsusudoy han kakalsadahan nga luob hin namamagpinalaypakay nga mga bandira nganagdudulong han mga punuan han bungto. Pawa ug mga tina nga magkadilain nakakaliaw han paniplat, mga tunog nga arangay ug mga binutubuto nakakalibang han pamatian. An mga lingganay waray hunong hin rupiki; namamagsulatsugat an mga kotse ug mga kalesa, an mga sangat nga kabayo usahay pinanngangalasan, nanlulunti, naugwad, nasinta, ug nahihimo nga usa nga waray bayad ngan hinurunghan nga pagkiritaon bisan diri upod didto han programa.
An Hermano Mayor hini nga adlaw nagpabantay hin mga suruguon didto ha tuna pagbiling hin mga sadang abiabihon, sugad han panagtawo nga igin-aasoy ha aton han Evangelio. Haros piniritay an pagkumbida pag-inom hin sikulate, kapi, siminte, pagpainit hin mga karan’on nga iirinom hin tubig ug iba pa. Diri la nakausa nga an pag kumbida haros nagin-usa nga panungboy.
Nag-iipagmirisa han mayor, an misa nga sinisiring nga misa de tres (de dalmatica), sugad han kakulop nga hinna-
