daog ha amon didto han patron ha Binyang ngan han didto ha Pilar ha Sta. Cruz.
“Nagpamulat kami nga dad’on ni Kapitan Tiyago an iya maurumagad, an manggaranon nga sumusunod ni D. Rafael, kundi abat ko nga baga buot magtundog hadton iya amay kay waray ngani pakita. Kanugon na hini nga tawo! Abat ko nga diri pagpupulsan.
“Hi insik Carlos nakakatirok hin damo nga salapi haliyampo; natatahap ako nga may tinago, tingali bato-barani; kanunay iton pagminugo hiton iya ulo nga masakit,nga aada binubutok, ngan kun an bato han liyampo hinayhinay na an pag-urok, naduko hiya ngada han paghisapingi, baga sugad hiton karuyag gud niya hitukiban. Nairit na ako kay may iba pa nga sumat nga akon hinbaruan nga masugadsugad hini.
“Adyos, Choy; an akon mga manok kaluoy sa Dios, ag an akon asawa malipayon ngan aadi naliliaw.
- Imo sangkay,
- “Martin Aristorenas.”
Hi Ibarra kinmarawat man liwat hin usa nga tinalamhutan nga surat nga idinuhol ha iya ni Andeng, an bugto ha suso ni Maria Clara, hadton gab-i han siyahan nga adlaw han patron. Nasiring hito:
“Crisostomo: Labis na hin usa kaadlaw nga waray ka pakikita; nakabati ako nga masakitsakit ka; igin-ampo ko ikaw ngan tinmagdok ako hin duha nga dagko nga kandila, bisan hi papa nasiring nga diri ka uraura. Kagab-i ngan yana nga adlaw naurit ako kay ginpipinirit ako hin pagtuktok han piyano ngan hin pagsayaw. Hunahuna ko diri duro in magpakauurit nga tawo dinhi ha kalibutan! Kun diri la tungod kan P. Damaso nga dako an panalinguha nga maliaw ako, ha pagsinumat ha akon hin lunlon makaliliaw, natago ako didto ha akon sulod ngan magkinaturog. Surati ako kun inaano ka, kay sisidngon ko hi papa nga lauyon ka. Yana, aada hi Andeng basi ka iglaso hin simente; maupay ito lumaso, bangin mauruupay pa ngani hiton imo mga suruguon.
- “Maria Clara.
“P. D. —Diri ka ngani kumadi buwas diri ako matambong hiton pagsaurog.
- “Vale”
