guliat, an baga ubos nga bahin han bungto, kun nakakakita han mga gumuruwa nga namamagharukay kun namamaghangkupay man, kundi diri nalahos dida. Ha una nga panahon mga drama la an iginpapaguwa; an parasiday dida ha bungto nagsurat hin usa nga ipaguruwa nga may ada away ha ikinaduha kaminuto, may uusa nga gupon ngan may magpakatarag-ob nga mga dikurasyon. Kundi tikang la an mga komedyante ha Tondo magpaguwa hin may araway ha ikinanapulo kaglima kasegundo ngan may duduha nga gupon ngan damo an mga pangasa nga diri sadang tuuron, an mga taga lalawigan nga parapanurat linupigan. An gobernadorsilyo dudyaganon hadto kaupay ug say nagpili, kasabot han padi, han komedya nga ginngangaranan "An Prinsipe Villardo ngan han mga Raysang nga Pinan-gabot didto han Tampalasan nga Lungib," nga asya in usa nga paguwa nga may mahika ug mga susuritan.
Usahay danay an mga lingganay magrupiki hin malipayon, adto ngahaw nga mga lingganay nga may nanapulo pa la kaadlaw in nahagos tikang namamagdinublas hin kasakit. An mga namamagbirik nga kalayo ug mga pabuto nakakaliga an pilipino nga parapanhimo hadto, nga nagtuon hito nga buhat hin waray hinkilal'an nga magturutdo, magpapakita han iya hinbabaruan kay naghimo hin mga baka, mga kastilyo nga may mga susuritan nga benggala, mga lubo nga papel nga pinabutol hin mapaso nga hangin, mga mag-inggat nga mga pabirikon, mga pabuto, mga kuwitis ug iba pa.
Nga binabati in hagrayo nga tunog nga arangay? Nagdadadlagan dayon an kabataan ngadto ha gawas han bungto pagsugat han musiko. Lima nga banda an ginsuhulan labot la hin tulo nga orkesta. An banda ha Pagsanghan nga kanan Eskribano diri makukulang didto, sugad man an ha bungto ha S.P. ha T. nga hadto bantog kay asya an gintututduan ni Austria, an waray himangkaagan nga kabo Mariano nga sinisiring nga aada ha katapusan han batuta niya pagdadad'a an iya kabantugan ug an iya iarangay han tunog. An mga musiko nadayaw han iya punebre nga ginngangaranan "El Sauce", ngan nanhihinganugon ha iya nga waray pag-aram hin papel kay nagiginbantugan unta ug makakapadungog han ngaran han iya tuna.
Nasulod an banda ha bungto ngan nagtutuktok hin usa nga makararayhak nga pasodoble, bunyog in kabataan
