pangpang, ikaw ngan hinin akon balay magtatampo ha akon panumduman. Dinhi kakaturog hini nga akon ginkinaturugan ngan gin-ininupan. . . sugad hiton hahani ako imo kalungon, imo kadirig. . .
— Oh! —nagsiring hi Elias ginlubag an mga butkon dara han pagturaw. —Babayi, imo bubuhaton yana nga ako hangalimot . . . —Nag-inggat an iya mga mata kundi usa la kadalikyat. Ngan pumuluspugos dida han mga butkon han daraga dinmalagan pinmakawara dida ha kasisidman han kakahuyan. Ginsunod pa ni Salome hin kita ngan inmukoy basi mamati han iya mga tunob nga nagtitikapara hamtang nagtitiharayo.
(Ini nga kapitulo XXV ibinutang ha APENDICE didto han NOLI ME TANGERE, edicion Castellana han J.R.N.C.C.)
Ha may mga ikasiyam an takna ha aga han sunod nga adlaw hi Juan Crisostomo Ibarra, katima sudoy han iya mga tuna, napakadto ha balay ni Tasyo, an tigurang.
Mamingaw an tanaman, kay an mga balinsasayaw, bisan kun namamaglupadlupad dida han pirok han balay, an tuman la nga nakakaaringasa. An lumot nagtitinubo didto han daan nga kuta nga say ginsasak’an han langingi nga napaabot na pagkantay ngadto han mga tangbuanan. Adto nga balay baga asya an puy’anan han kamingaw.
Ihinigot hin maupay ni Ibarra an iya kabayo dida hin usa nga lurungan ngan umikid paglakat dida han mahawan ug inataman hin maupay nga tanaman; sinmaka hiya han hagdan, ngan, kay diri man sinadhan an purtahan, sinmulod.
An siyahan nga butang nga binmulang ha iya mga mata amo an lagas nga nahapapatamod ha usa nga basahan nga baga iya ginsisinuratan. Ha mga puto nakikita in mga tinirok nga mga mananapay ug mga dahon, sakot hin kadam’an nga mapa ug mga kadaan nga burutangan hin basa han nga puno man ngahaw hin mga sinurat ug mga barasahon.
