akon hin maupay nga aga; hinihigugma ko an kaagahon kay katapos ko pagpahamutang hin maupay han akon panimalay, dagos ko sasakay hin usa nga subiran ngadto pagbaligya hin pagkaon han mga mag-irisda nga danay ha akon pumahat, kun diri man, tinutugutan ako nira pamuknit han mga turay dida han mga matamata han pukot. Hinigugma ko an gab-i tungod kay nahatag hin higayon pagpahuway dida han mga kagul’anan ha adlaw, hin higayon pag-ininop ha sirong hini nga kakawayanan, o han awit han iya mga dahon nga nakakapalimot han mga kasubo han kinabuhi, ngan tungod kay an gab-i amo an nagpapauli kan nanay ha balay tikang ha panggingge nga say namon ginkakabulagan hiton bug-os nga adlaw. Ta, tikang ta ikaw igkakilala, an aga ug an gab-i nawaray na kawilihan, an kulop na la an akon mahusay. Danay ko maisipan nga an aga ginhimo basi ig-andam pagkarawat han mga kalipayan ha kulop, ngan an gab-i basi ig-inop ngan igpahiagom han mga hinumduman ug napupukaw nga mga pagbati. Tubangan pa hahani ha akon an paghupot ha kadayunan hini nga akon kinabuhi!. . . Sayod an Dios nga igo ko na la ini nga akon palad, waray ko iba nga ungara kundi lawas nga ipakakagbuhat, diri ko ikinaawa han mga manggaran an irasalapi kundi. . .
— Kundi?
— Waray, diri ko ikinaaawa ha ira an bisan ano hamtang imo ako sangkay.
— Salome, —nagsiring an batan’on lakip in mapait nga kasakit;—sayod ka han mapintas nga kinabuhi nga akon gin-agian ngan maaram ka nga an pagkawaray ko palad diri kay akon la ngahaw buhat! Kun diri la tungod hini nga maraot nga lambong nga nakakaaghat han akon usahay paghunahuna hin mapait nga pagdumdom han nasugaran han pagkaasawa han akon mga kag-anak, kun diri la tungod kay diri ko buot nga an akon mga anak manag-antos han ginantos namon ngan han akon bugto nga babayi ngan han ginaantos ko yana, kadam’an na unta nga bulan nga igin-asawa ta ikaw ha atubangan sa Dios ngan yana aadto na unta kita pag-uukoy ha karupdupan han kagurangan, harayo han pag-ukoy han mga tawo. Kundi tungod ngahaw hini nga higugma, tungod hini nga panimalay nga sano buwas iginsumpa ko an pagpoo hini nga suhi nga palad nga gawad tikang ha amay ngada ha anak nga amon
