nga sulo nga kawayan nga dinuduyugan han mga sista, pabay'i ta nga managsulsog han dalan tipakadto ha bungto. An pagkaburunyog nagtitiiban, an mga suga tikaparong, an awit nahunong, an sista naukoy, hamtang nagtitiharani ha ira urukyan han kalalakin'an. Ipanmutang an iyo mga panahob ha bayhon kay aada na liwat kamo igkakatarampo han iyo kabugtuan!
Kun an mga dungganan nga guwardya sibil, katapos pagsamuka han mga magbarakasyon, nagpasingadto hin usa nga huron nga amon hinbabaruan, ugsa matunod an adlaw hadto nga kulop, waray ruhaduha iginkikita han ira ginbibiling.
Asya in usa nga payagpayag nga makaruruyag, nga natitindog ha ligid han danaw, ha bawbaw hin usa nga pungtod nga diri inaabot han baha, ha sirong hin kakawayanan, kabungahan ngan kalubian. May mga gudti nga bukad nga magpula, sugad han kamantigi ngan han marabilyas, nanunubo dida ha ligid han minalahimo nga kuta nga mga buhi nga bato nga waray tiksapi sugad han haruhagdanay nga linulusaran ngadto ha danaw. An dapit ha igbaw pawod ngan idyok nga linupit hin mga sinipak nga tangnan ngan sinabngan hin mga bendita nga lukay ha Domingo de Ramos, ngan hin mga hinimo nga bukad nga timsim nga tikang ha China; may uusa kapuno nga burak nga nasuksok dida han tangbuan nga bukas hin usa nga usyuso nga sanga nga nagtatalambot han hangin. Ngadto ha bubungan han atop nagdadaginot na pagpanaka an mga manok ug mga ugang, hamtang an iba nabulig pa han mga pato, pabo ngan sarapati pagtimod han nanhihibilin nga mga lugas hin humay ngan mais nga saburak dida ha natad.
Didto ha pantaw nagpapahimulos han kapawa han adlaw, nagtitinahi in usa nga batan'on nga babayi nga may nanapulo kagpito o kakaruhaan ba an panuigon, hin bado nga masilhag nga mga buhi an tina nga magkalainlain. An iya pamanapton kinablasanon kundi mahinis ngan tultol ha maupay nga pamatasan: an iya bado sugad man an saya ug tapis luob hin tangkop ngan sinursihan. An iya la sabong, an ngatanan nga alahas ha lawas amo la in usa nga
