— Nga ihatag ha amon, yana ngahaw, in usa nga kriminal nga ginngangaranan kan Elias, nga asya an iyo mag-urulin kanina han aga, nagsiring an sarahinto, nananarhog pa.
— Usa nga kriminal? Mag-urulin? Tingali nagsasayop ka! binmaton hi Ibarra.
— Diri Ito nga Elias iginsumbong liwat hini nga bago tungod hin pagpasipara hin usa nga padi...
— Ah! ngan amo an paraulin!
— Asya, sugad han sumat ha amon; ikaw, Senyor Ibarra, natugot ka nga tumampo ha imo mga panagtawo hin mga tawo nga magraot in bantog.
Siniplatan hiya ni Ibarra tikang ha tiil ngadto ha ulo ngan batunon hin dako nga pakalabaw:
— Waray ko kinahanglan magpasabot ha imo han akon mga binuhatan! Dinhi hinin amon hiringyon bisan hino makakatampo, bisan ikaw, kun daw napakanhi ka, nakakatangka ka ha amon pangaon, sugad han imo alperes nga may duha la kauras nga nalakat dinhi.
Ngan katima hini pamulong iya talikdan.
Kinmagat an sarahinto han iya bungot ngan tungod kay nakahunahuna nga hilulupigan hira kun makigsuhay, nagsugo nga pamilngon an paraulin ha bisan diin nga kasuksukan han kakahuyan, sugad han mga tigaman han dagway hadto nga tawo, nga iya hinkakaptan nga nakadto nahababadlis hin usa kapinit nga papel. Ginsiring hiya ni don Filipo:
— Sabuta nga ito nga mga tigaman iginkakairigo han sisiyam ha tagsa kanapulo hinin mga dinhianon; tingali ka magsayop!
Waray kaiha bumalik ngada an kasundaluhan ngan namagsiring nga waray nira hin-agian nga baluto ngan tawo nga sadang pagruhaduhaan; an sarahinto hinmutib hin pira kapulong ngan lumakat hin sinugad gihapon han pagpangulpot: sinundalo.
An kalipay binmalik hin hinayhinay, inmuran an mga pakiana ngan hinmurak an mga karukayakan.
— Asya ngayan ito an Elias nga nagtanlod han alperes didto han lam-aw! — nagsiring hi Leon, nagpipinanmurubuot. — Napaunano ito paghinabo, napaunano? - nanmakiana in pipira nga karuyag masayod.
— Nasiring nga hadton bulan ha Septyembre, usa ka-
