— Tungod kay ako in pagsasalaon mahatungod han salapi. ...
— Maupay nga baton, baraan nga magmarangno hin mga kalag! — tinapo han alperes, puno an baba. — Maupay nga baton, banal nga padi!
Hi Ibarra buot na sumagbang, kundi hi P. Salvi nangahas pag-ibaraton may dara ha bayhon nga usa nga pinirit nga tawa.
Ngan maaram ka, Senyor Alperes, kun ano an siring han mga tawo mahatungod han pagkawawara hito nga kabataan? Diri ka maaram? Ta, pakiana la hiton imo mga sundalo!
— Ano? — nakapakiana an alperes waray na hikatawa.
— Nasiring nga hadto nga gab-i nga ira ikinawara hinbatian in pira nga buto!’
— Pira nga buto! — ngani han alperes, nagkikinita han mga katarambong.
May hintangdo han ngatanan.
Nagpadayon hi P. Salvi hin hinayhinay, dara in waray kapaid nga tiaw:
—Ngayan. Naabat ako nga diri ka nakakadakop han mga kriminal, diri ka nasasayod kun ano an binubuhat hiton imo mga sakop ngan karuyag ka pa sumulod kamagwawali ngan kamagturutdo han angay buhaton han iba. Angay ko sayod ka han kasiringanon: “Mas sabe el loco en su casa. .. ,”(5)
— Kaginuuhan! — binmul-ang hi Crisostomo han pagkita nga iginpupurud-as na an alperes; — iito pa an iyo hiruhimangraw, ano kamo hini nga karuyag ko buhaton? Naghuhunahuna ako hin pagbutang hito nga tuyaw ha kamot hin usa nga maupay nga mediko, ngan hin pagbiling han iya mga anak. Natapod ako han iyo mga sagdon o mga pagbulig.
An pagpangulpot han mga suruguon nga waray pakaagi han tuyaw nakapamingaw han duduha nga nagbabalingkot ngan nakapabalhin han himangrawon.
Katapos han paniudto ngan hamtang nagdudurot han siminte ngan han kape naghinpundok an mga batan’on ug katigurangan hin magkalainlain nga hugpo. May nanmurot hin ahedres, may napasingadto han baraha, kundi an kadaragan’an nga mag-inasahon hin pamakiana mahatungod han maburuwas, say ginapilan an Rueda de la Fortuna.
