titikang na an mga baled ngan inaabat dida han linulutawan ban buaya nga nanhahatol “sugad hin bukid nga bura,
diin nakikita an silaw han adlaw nga magkalainlain an
tina”, siring pa ni R. A. Paterno nga parasiday.(12)
An mga turunggon binmalik panhibatii: hi Iday nagkikinablit han harpa, an kalalakin’an nagpapatunig han kordiyon ug mga sista, nga kun usa arangay, kun usa diri, kundi an nalabaw ha ira amo hi Albino nga nagkakabrang hin tinuod han sista, nabulag ngan natiway han buntad han kadam’an ngan kun usa nahangangalimot han ira gintutuktok nga sunata, say na la isinusumpay in lain.
Baga waray na nira tatapuri kaupay an usa nga bunuan: damo an nagpapamulat nga aadto didto an kapadis nga buaya; kundi an palad uraura kamasuri; kanunay puno hin isda an sikpaw.
Hi Dada Isabel naglalarang:
— Iton ayungin maupay nga tinola; isalin iton bul-a kay iiskabitsihon; iton turungaw ngan hiton mulanbulan angay nga pisa: an turungaw maiha mamatay. Ibutang la didto ha sikpaw ngan puyuta didto ha tubig basi diri lumuya. An pasayan sanglagon! An balanak saktan hin kamatis ngan tum’on dida ha dahon. Pabay-i na an iba didto basi makadapit hin iba pa nga isda: diri kaangayan ubusan hin isda an bunuan, — nganiya pa.
Katima han tibaw magtipakadto hira ha tabi, ngadto han kagurangan nga dagko in kakahuyan, nga lugaringon nira Ibarra. Didto han kalindungan ha daplin han malinaw nga salog aadto pamamahaw, ha butnga hin mga bukad, kun ha sirong man hin karaykay.
An tunog han mga turunggon nakakapuno han danaw; an aso han mga kalan nag-uusbok tipaigbaw baga in mga buhawi; an tubig nag-aawit ha sakob han daba nga gindadangdang han kalayo, baga sugad hin nagliliaw han nagkakamamatay nga kaisdaan didto ha sakob, kun diri lugaring nahakakatiaw ha ira; an lawas han buaya nagbabarubalintong ha bawbaw han tubig, danay na man say kitaon an mabusag nga tiyan nga guray, danay na man an burok nga bungkog nga lumuton, ngan an tawo, inugayan han Kapalaran, diri la naaalantad han kadam’an nga iya kabugtuan nga nagkakamamatay han iya buhat, siring pa han mga pulong han mga brahmines, o han mga magpakiutan.
