Waray kaiha may nagpanlapirit: an kababayin’an nag gugliat ngan nanarop han ira mga talinga. Diri iba kundi an tipagparadi nga Albino nga naghihinuyop, binubuhian la an kusog, han sungay hin karabaw nga ginngangaranan nga tambuli. An katatawa ug kamarugyaw binmalik liwat: an mga mata nga nagkapupuno hin luha nanhikatawa liwat.
— Ano, karuyag mo nga magkabubungol kami, irihis? — ginuliatan ni Dada Isabel.
— Ginang! - nagbaton an tipagparadi hin waray tawatawa; — nakabati ako hin sumat mahatungod hin usa nga parahuyop hin trompeta didto ha mga tangpi han Rhin nga tungod la hin nakausa nga paghuyop han trompeta nakaasawa hin usa nga daraga nga manggaran ngan hataas in tulin.
— Matuod ito; an “Trompetero ha Sackingen”! — sinmumpay hi Ibarra, waray pakailob hin diri pagsagbang han kamarugyaw na liwat.
— Nakabati ka? — ngani Albino; — ta, karuyag ko _kitaon kun may sugad ko man nga palad.
Ngan bumalik hin paghinuyop liwat han matunog nga sungay, makurukusog pa ngani han una, iya pa ngani ihinaruharani ngadto han mga talinga han kadaragan’an nga labi nga nagkasusubo kanina. Salit namay-gutiay nga aringasa; napirit hiya hin paghunong tungod han mga iroy nga nagtatarhog ha iya hin mga sinilas ngan mga kuribot.
— Agi, agi! — sinmiring, naghihinapyod han iya mga butkon. — Kaharayo han ginkakalainan han Pilipinas ngan han mga tangpi han Rhin! Oh Temporal Oh mores! (8) May nagpapakamama la, may diri! Ngatanan namagkatatawa pati hi Victoria, kundi hi Sinang, an maglipayon in mga mata, naghihinuring kan Maria Clara:
— Maupay ka pa! Hay, kun nakakakanta la ako nakanta man unta ako!
Waray kaiha hi Andeng magpasabot nga andam na an tulaan.
An bata nga anak han parabunuan sinmaka ngadto ha daydayan han karitan nga nakadto ha katapusan han bunuan ngan didto angay kita makapamulong han Lasciate ogni speranza voi ch’entrate kun pananglit an mga isda maaram magbasa ngan nasabot han Italyano: kay an isda nga sumulod ngadto isda nga diri maguwa kun diri ngadto ha kamatayon. Asya adto in usa nga malidong nga usok nga inali-
