— Akon bayad an paguwaan! — binmul-ang hi Kapitan Basilio.
—Kun may maguwa nga mga kuwadrilyeros ipahuhuram ko an akon mga sakop!—sinmiring man an kapitan.
— Pati ako... pati ako.... kun karuyag in tigurang ....—pinmur-ang in usa nga ginmangkaaw, nagpapakatakos.
—Tugot! tugot! — nabati in kadam’an nga tingog.
An tenyente mayor ginduduas hin paghingusbo; ginpapanluha an iya mga mata.
— Nagtatangis hin kaalo! — nakasiring an diri napabaribad, ngan ginmuliat,—Tinatangduan hin waray na balingkutay.
Ngan tungod kay tinmunga han iya pakabulos ngan han paglupigi han iya kaaway, an tawo nagtikang hin pagdinayaw han iginpahayag han batan’on. Ini nagpadayon:
—Usa nga ikalima kabahin han salapi nga natirok mahihimo ta paghigamit ha panhatag hin mga premyo, pananglitan, han maupay nga bata ha liburan, han maupay nga paramangno hin hayop, han maupay nga parauma, parapangawil, kun parapangisda oman, ug iba pa. Makakahimo kita pagbutang hin rumba ha salog ngan ha danaw, rumba hin kabayo, usa nga sinibuhan nga anibong nga daraplason ug iba pa nga mga uyag nga maaapihan han mga taga uma, Matugot ako nga dida hini, tungod han aton batasan nga diri na maliliwat, mamay-ada kita mga susuritan: mga mananagbirik nga kalayo ug mga kastilyo nga nakakahatag hin kaliawan nga makawiwili ug makalilipay, kundi diri ako natuod nga kinahanglan pa in mga paburuthon sugad han pinangangaro han tenyente mayor. Basi magmaribhong an pyesta, duha nga banda hin musika igo na basi mahirutan ta na ito nga mga aruaraway(15) nga nakakapahanugad hiton magpakaluluoy nga mga musiko hin iburulang nga manok nga nanguneguli gudtiay in bayad, an tuman la nga nagpapakakaon, nanhuhupong an mga nawong ngan usahay mga samad. Iton salapi nga lumabis mahagagamit hin igtitikang pagtindog hin gutiay nga balay nga gagamiton nga liburan, kay diri kaangayan nga kita maghulat pa han Dios nga lumusad ngan say hito magtindog. Makasasakit nga kahimtang nga may ada kita usa nga bublangan nga diri sadang lupigan kundi an aton kabataan ha-
