mati hiton binutubuto hin diri mamumungel. Nagpakiana ako kun ano an baga ha ira hinin mga tawo nga may ada mga buot, ngatanan nariwa han pinangangaro ni D. Filipo. Diri ba asya, kaginuuhan?
— Amo! amo! —nagsarabat hin pagsiring an mga batan’on ngan han kalagasan. An mga batan’on nanhihikalipay hin pamati hin sugad hadto nga lagas magyakan.
— Ano in kinahanglan ta hin uupat nga hermano mayor? —nagpadayon an tigurang. — Ano in karuyag sidngon hito nga mga ugang, mga kapon ug mga inasal nga ilalabog ha danaw? Kinahambugan! Masiring an aton mga higrani nga bungto, ngan unina magpupuasa kita hin kanan tunga hin tuig. Ano in labot ta kanda Sila ngan han mga romanos? Gin-abiabi na ba kita nira ngadto hiton ira mga panagtawo? Ako, waray pa ako karawat hin surat ha pag-abiabi tikang didto, aadi ako lagas na!
— An mga romano aadto pangungukoy ha Roma, didto han inuukyan han Papa! —hinuringan ni Kapitan Basilio.
— Kasasayod ko pa la! —nakasiring an tigurang hin waray kaalantad. — Tingali kun namamagpyesta adto hira, kun mga bihilya, ngan an Papa nagsusugo nga ipanlabog ha dagat an mga karan’on basi dirt managpakasala, Kundi, bisan la, iton tyo pinangangaro dirt matutugutan, diri mahihimo, usa nga kabinuangan!
Hi D. Filipo nga riniwa hin siniguro, nag-isol han iya pinangangaro.
An mga tigurang nga diri napapamartbad, nga pinanhihiayunan han paglupigi han ira labaw nga kaaway, waray mabaraka pagkita nga nabuhat in usa nga batan’on nga ginhaupan ngan mangaro nga makagyakan.
— Pinangangaro ko ha iyo mga kaginuuhan, nga iyo ako pasayluon kun, bisan la ako batan’on pa, magpasipara pagyakan ha atubangan han kadam’an nga mga talahuron nga pagkatawo, diri la tungod han ira panuigon kundi tungod man liwat han ira kamagnanong ug ira kamapainuinuhan ha ngatanan nga mga pagkasarabutan, kundi tungod kay an mapiskay ha pinulungan nga Kapitan Basilio nagagda man han ngatanan nga magpahayag dinhi han ira panhunahuna, mahimo unta adton iya dinig-unan nga mga pulong nga usa nga sandiganan hinin ubos nakon nga pagkatawo.
