lain han mga pakiana dida han mga baton ngan kun ano
an karuyag sidngon hito ngaduha. Ug asya ini an aton kamamatyan ngan asya ini an pagsusundon han bag-o nga
magkakatatawo, ngan didto ha Europa unob an paghiruhi-mangraw mahatungod han Kauswagan!
—Ayaw kita pagturaw! — binmaton hi Ibarra ngan binmuhat. —Gin-abiabi ako han tenyente mayor ngadto hin usa nga katirok ha tribunal. . . Tingali kun didto makaagi ka hin baton hiton kadam'an mo nga mga pakiana.
Binmuhat man an magturutdo kundi pinmiling han ulo, dara han iya pagruhaduha, ngan namulong;
—Kikitaon mo na nga ito nga imo ginhuhunahunaan nga iginsumat ha akon masusugad hin dadangatan akon! Abata la!(11)
Uusa adto nga ruwang nga may nanapulo kagduha o nanapulo ba kaglima kametros an kahalaba ngan may wawalo o nanapulo ba an kahaluag. An mga bungbong pinintaran hin apog ngan pinanhimuan hin agi hin uring hin usahay magraot, usahay maglaw-ay nga mga dagway nga pinanuratsuratan pa basi matukib an ira kahulugan. Ha usa nga piliw ngan ipinananandig ha puto, hin turupad, nakikita in may nanapulo nga mga daan nga surit-surit nga pusil, katampo hin mga amol nga sable, mga samsil ug mga talibong; asya adto an mga hinganiban han mga kuwadrilyeros.(3)
Ha usa nga katapusan han ruwang, nga sinabngan hin mga maghugaw nga biray nga pula, nakadto natatago, binitay ha puto, an retrato ni S. M. an Hadi; ha ubos han retrato, ha bawbaw hin usa,nga tarima nga kahoy may ling. kuran nga dako nga nagpapawada han iya mga butkon nga mga guba; ha atubangan may uusa nga lamisa nga kahoy nga tintaon ngan kunutkunot na hin agi han hilangkag, sugad hiton kadam'an nga mga lamisa didto hiton mga tabernas ha Alemania nga karadtuan han mga magturuon. Mga bangko ug mga lingkuran nga mga agup-upon asya in nakakasangkap han mga ginamit didto ha sakob.
