naadmananon, linmusad ngan magdinalagan ngadto ha kalsada bisan duro an uranos ngan an kamasirumsirom. Usa nga mabislaw nga kikidlat nga sinundan hin makalilisang nga dalugdog nga nagpasarang han iya makaharadlok nga linti, say naglawag han lagas nga nagtitighaw ha langit han mga kamot ngan naggiginuliat: —Namamaribad ka! Maaram ako nga diri ka di-mapinairon, maaram na ako nga angay ta ikaw tawgon nga An Maupay!
XV. AN MGA TANOD Nakinanuog an mga dalugdog, nagsusunudsunod, nagsusuunsuon; tagsa nga dalugdog gin-uunhan hin magpakalilisang ngan hikohiko nga mga lilinti: baga sugad hin an Dios nagsusurat hin kalayo han iya ngaran, ug an kalangitan nangungurugkurog hin kahadlok. An uran baga in sulog an panuro ngan tungod kay iginpupuspos han ha ngin nga nag-uuwang, waray puon an hawog han mga turo nga dapit nalulurong. An mga lingganay hindudunggan hin tingog nga tugob hin kahadlok, namamagluwas han ira malanoy nga pangaraba ngan dida han tigdali nga pagmingaw han garhob nga ngurob han mga bansag nga namagpakalayaw, binabati an masamdong nga tingog nga daw sumbong, daw nguyngoy. (1) Didto han ikaduha nga igbaw han lingganayan, nakadto an duduha nga kabataan nga aton na hinkit’an nga nakighimangraw anay han pilosopo. An manghod, nga dagko an mga mata ngan kanan mahadlukon an nawong, nagtutuyo hin pagdukot didto han iya magurang nga masugadsugad ha iya gihapon an nawong, lugaring kay an paniplat hini magdurudulot ngan an iya panagway kanan diri nag-aalang. Ngaduha nagpapakasul-ot hin panapton nga kinablasanon nga luob hin sinursihan ngan tinangkupan. Nanlilingkod dida hin usa nga kahoy, tagsa ha ira nangangapot hin pisi nga nanununton tikang didto ha ikatulo nga igbaw, tikang didto han kasisidman. An uran kun pinupuros han hangin naabot ngadto ba ira ngan say naghuhuyop han ira suga nga kandila nga itinatagdok dida han dako nga bato nga garamiton pagpadalugdog, gintatarutambulilid didto ha kudo kun mga Byernes Santo.
