gin-aamatog ngan an iya kiwá bagá kanán nag-uunáy
nga japonés.
Sidnga niyo lugód nga nagpapakasakitsakit la kay nahadlok hin paggawás! Hikit'an ko ngani hiyá...
An maestro inatake liwát hin makusóg nga ubó ngan waray na pakailob nangamaya han ngatanán nga nakadá nga magpanguli na.
-Kundi, mag-andam, mag-andam, nasiring an parapanhimó hin pabutó. -Kun karuyag kitá pagpiriton hin pamatay o kamatay....
Binmalik an pag-inubo han waray palad nga maestro platero ngan an mga obrero ngan mga opisyales namagpanguli ngadto ha ira tagsa nga baláy may mga dará nga paló, lagadí ug ibá pa nga garamitón may mataróm, may dupól, namag-andam hin pagpahaunong han ra mga kinabuhi. Hi Placido ngan han parapanhimó hin luthang binmalik pagkalakat.
-Pamaghinay, pamaghinay kamó!— nananagdon an maestro platero hin pulong nga matangison.
-Ikaw na la in labí nga maaram han akon asawa ngan mga anák!- nakikimaluoy an sumatán hin tingóg nga labi pa kamatinangison.
An waray palad nga tawo nakasiring na nga an iya lawas gintahustahos hin mga bala ngan iginlulubóng na hiyá.
Hadto nga gab-i an mga bantay didá han mga ganghaan han siyudad sinaliwanan hin mga artilyeros nga kakatsilan ngan han kabuwás, ha siyahan gud nga pagdan-ag han adlaw, hi Ben Zayb, nga nagpasipara pagpasyada hin aga pa pagkita han kamutangan han mga kuta, nakakitá didto han kayapdan ha bawbaw han kuta, haraní ha Luneta, hin usa nga indiyo, nga batan'on pa, nga patáy, haros waray panapton, ngan ginbabyaanan la. Hi Ben Zayb nangirhat, ngan katapos niya bundulá han iya bastón, ngan katapos paniplat tikadto han mga ganghaan han kuta, magpadayon han iya lakat, may tuyo niya hin pagsurát hin usa nga susumaton mahatungod hin gugma nga makaaramdok. Waráy man lugód adto hinabihi han mga pahayagán han mga sunód nga mga adlaw, say la hinlangkagán in mga kahulog ug mga paghibakinás tungód hin pakatamák hin parot hin saging, ngan tungod han kakulang hin notisya, hi Ben Zayb ngahaw say na la naghinabi hin halaba hin usa nga ciclon didto ha America nga nakagubá hin mga bungto,
