Hi P. Fernández waray bumatón; nagpadayon paglinakatlakat kundi iniirasan, daw may iya kahangít.
-Nasiring ka nga an mga tuna waray mga tanóm! nagpadayon hi Isagani hin lain nga tingog, katapos hin halipot nga paghunong; -ayáw kita yaná paghikay kay anó, kay mapahirayó kita kaupay; kundi, ikaw, P. Fernández, ikaw, propesor, ikaw, nga makinaadmananon, karuyag mo in bungto hin mga magburuhat, hin mga mag-uruma. Para ha imo, an parauma amo an hingpit nga kamutangan nga sasangpután han tawo han iya lakát tipauswag? O karuyag mo an hibaró para ha imo, an pagbalhas para ha iba?
-Diri, karuyag ko nga an hibaro maginpara-hadton angay habaró, para hadton mahababaró hin pagmangno ha iya, binmatón; -kun an mga estudyantes magpakita nga may ira paghigugma han hibaró; kun hikit-an in mga batan'on nga may pagmatuod, mga batan'on nga mahababaró pangaway pag-ugop ngan pagpagtahod han dungog mamamay-adá mga propesores nga maaram managhunahuna! Kun may mga propesores nga namamagpahusa tungod kay may mga magturuon nga natugot la nga managpahusa!
-Mamay-adá ngani propesores mamamay-ada mga estudyantes!
-Magtikáng kamo hin pagbalhin han mga gawi, kay kamó amo in may kinahanglan hin kabalhin, ngan kami masunod na la.
―Oo,- nagsiríng hi Isagani hin mapait nga hiyom; -nga magtikáng kami pagbalhin kay hahani ha amon an kakurian! Sayod ka daw la kun ano in napaabót hin usá nga magturuon kun naatubang hin usa nga propesor; ikaw ngahaw lakip an imo paghigugma han pagkamatadong, lakip an imo mag-upay nga mga pagbati, sakuri ka nga nakakapugóng ha imo ngahaw yaná nga ginsusumatán ko ikaw hin magpait nga kamatuuran, ikaw ngahaw, P. Fernández! Anó in kaupayan nga nakuha hin usa ha amon nga naruyag pagpalakát hin bag-o nga mga panhunahuna? Ngan anó in maraot nga imo nasalod tungod kay ikaw naghupót han pagkamaupay ngan nagtuman ka han imo katungdanan?
-Senyor Isagani, nagsiring an dominiko, dinmuhól han kamot; bisan kun didá hini nga aton himangraw baga waray la anó man nga nakuha, may adá gihapon pagpupulsan; makikighimangraw ako hinín akon
