Nagkabalyo hirá hin papel; hi Isagani nga napakadá pagsukmat say lugód sinukmatán ngan na payaán hin himaya han pagsidnga ni Paulita nga ginpapasaylo. Mahatungód han paghingadto hini ha teatro angay pa ngani niya igpasalamat; hiya ginpirit ni iya dadá, ngan nalugos pag-upód kay naglaom nga igkikita ha iya didto han paguwá. Giiinintrimisan la niya lugaring hi Juanito Pelaez!
-Hi dadá amo in nahagagaróy!-nagsiríng, nagtitinawa ha dako nga kalipay.
Nagkatatawa ngaduhá; an pagkasál kanda Pelaez ngan hi donya Victorina nakalipay ha ira ngaduhá ngan ira kinikita sugad hin nahihimo na, kundi hi Isagani nahanumdom nga hi don Tiburcio buhi pa ngan iginsumát ha iya higugmaon an tinataguan katima papagsaara nga diri magsusumát bisan kanáy. Hi Paulita nagsaad, kundi may iya tuyo nga iya igsusumát ha iya amiga.
Ini nakadara han himangraw ngadto han bungto ni Isagani nga libot hin kagurangan ngan aadto ha ligid hin dagat nga nagrurumpat ha tiilán hin mga kantil nga bató.
An paniplat ni Isagani nagpapawa kun nahamamangraw hadto nga harayo nga dapun; an kapasó han paggasád nagdangdang han iya bayhon, nakurog an iya tingog. An iya panhunahuna nga magsiriday nasukob, may kapasó han mga pulong nga nagpapan-gawás, tugób hin kasindak sugad hin naghihimangraw hin gugma, han iya gugma, ngan waráy hikailób pagyakán:
-Uy! didto han kamingawan han akon mga bukid daw hayaw akó, buhi sugad han hangin, sugad han silaw nga nalatos ha walog waray pugóng! Yukót nga kalarakan, yukót nga palasyo ihahatag ko padang hin usa nga daplin ha Pilipinas diín, harayo han mga tawo, makakag-ukoy ako hin totoo nga diri pinugngan! Didto ha atuba- ngan han pagkakinaiyá, ha atubangan han katingalahan nga diri matukib ngan han waray katubtuban nga kahaluagan, an kagurangan ngan han dagat, maghuhunahuna, magyayakán ngan magawi ako sugad hin tawo nga diri nakilala hin manlulupig!
Hi Paulita, tungód hadto nga kasindak pagdumdom han bungto nga natawhan, kasindak nga waray niya kasasantop, kay nahaaara hiya pamati hin mga pakaraot han iya tuna ngan danay ngani hiyá sumabát, bagá in-
