-Hi P. Irene, -nagpadayon hi Makaraig, -nagsumat ha akon han ngatanán nga nahinabó ha Los Baños. Bagá ginlinantugi nira an asunto hin diri makulang hin usa kasimana, hiyá kunó an inmugop ha aton hin pangatadungan patok han ngatanán, patok kan P. Sibyla, kan P. Fernandez, kan P. Salvi, han Heneral, han Segundo Kabo, kan alahero Simoun...
-Hi alahero Simoun?- sinmagbang in usá: -Anó in labot hitó nga hudiyo han mga butang hini nga tuna? Ngan aton ginpipinadamó iton iya manggad kay nagpipinamalit kita didá ha iya....
-Saba daw! nagsiring in usá nga iniirasán ngan naiikag hin pamati kun inunano ni P. Irene in pakadaóg hin sugad kamagpakaharadlok nga mga kaaway.
Pati may mga dagko in katungdanan nga kinmuntra han aton proyekto, an Director de Administración, an Gobernador Civil, hi insik Quiroga *....
-Hi insik Quiroga! An bugaw han mga...
-Saba daw uy!
-Ha katapusan, -nagpadayon hi Makaraig, -hinihipos na unta an espedyente ngan pabay'an nga kumaturog hin kapid'an kabulan, han paghinumdom ni P. Irene han Comision Superior de Instrucción Primaria ngan nangaro nga, tungód kay nahananabi man han pagtutdo han kinatsilá, nga an espedyente ipadará ngadto basi buhaton hin dictamen bahin kun anó an nahaaangay...
-Kay didi ba ito nga Comisión maiha na nga waray pagkikiwá? nagmugó hi Pecson...
-Amo itó an ibinatón nira kan P. Irene, -nagsiring hi Makaraig, -ngan iya binatón nga maupay nga higayon adto basi mabanhaw ngan dará han pagpahimulos han paghitambong ni D. Custodio, nga usa han mga vocal, nangaro nga hadto ngahaw tukuron an comisión, ngan daan kilala ngan dayág an kamaduruto ni D. Custodio, say ini gintungdan nga ponente ngan yaná an espedyente aadto ha iya mga kamót. Hi D. Custodio nagsaad nga huhumanón niya ha sakób hini nga bulan.
-Mabuhi hi D. Custodio!
-Kun hi D. Custodio maglaráng hin diri pagtugot? -nagpakianá an matinurawon nga Pecson.
Waray ini nira pagpapamulata kay nahuhubóg hira han panhunahuna nga diri an asunto pakakaturugon. Ngatanán naniplat kan Makaraig kun ano an maupay.
