bunók, labot pa, sugad han sumat hin usa nga opisyal
ha hukmanan, an pagriwa han bisan ano diri nahasasakób han bisan ano nga kasarakban; kundi an maraot nga
batasan nga diri pamati han kalugaringon nga kasingkasing, an kakulang hin pagtapod han mga tagá hukmanan
ngan dagos panmimiling hin iba nga sadáng makasagdon,
bisan kun an kalugaringon nga panhunahuna tuang na,
amo an nakapyerde ha iya. An mga katarampo nagsisininyason ha iya pagpatangdo, labi na hi Juanito Pelaez,
ngan kay pinmadara han iya maraot nga palad, binmuliw hin usa nga concedo, Padre, hin tingog nga daw kanan
naghihingutás, sugad hin baga karuyag niya sidngon:
In manus tuas commendo spiritum meum."
-Concedo antecedentes.- sinmubád an katedratiko nahakakahiyóm hin tiaw; ergo, makakahimo ako pagkaros han asugi dida hin usa nga espeho nga salaming ngan liwanan ko hin pinit nga bibingka may ada la kita gihapon espeho, ano ka? Ano in magawás?
An batan'on sinmiplat han iya mga manaragdon ngan han pakakita ha ira nga nanhihipangangá, waray may nagyayakán hinmataw ha iya nawong in usa nga mapait nga pagkuriot. Deus meus, Deus meus, quare derelequiste me? nasiring an iya ginpapanlugmawan nga mga matá hamtang an iya mga im-im nangurutob hin "linintikán!" Kawang an iya pag-inubo, pagbinutong han petsera han iya bado, pagsarig ha usa nga tiil, katima ha luyo na man, waray gud pakakaagi hin katuhayan.
-Aber, ano aton mahihimo? nagsiring liwat an katedratiko nahakakalipáy nga an iya argumento nakakagupong.
-An bibingkalan dikta ni Juanito Pelaez, -an bibingka!
-Saba, bobo!- ginuliatan ngahaw hiyá han nahuhulop na nga batan'on nga karuyag maglikáy didto hadto nga kompromiso, gabáy mahimo nga buruka.
-Aber, Juanito, kun makatuhay ka hini nga kasamok! nagpakianá na ngahaw an katedratiko kan Pelaez.
Hi Pelaez, nga usa han iya mga minaupay, binmuhat hin hinayhinay kundi sinikó anay hi Placido Penitente, nga amo an nasunód ha iya dida han lista. An sikó karuyag sidngon: "Pamati, diktahi ako!"
