"No ontan bilang so nagawa, no say kanunótan yo et naápa, natilak a timpey na linawa yoy pannodnunot
yon ginawa yoy anggay nayarian yo, tan isisipen kon walan siansiay naálan kaabigan: inletneg yoy inmonan bató, nansibuag kayoy biní, tan diad kalabas na bagyo, nayarin walay sakey a bukel ya ontubo tan nabilay ya ag onandin aminpinsan so intanem yo, tan sayan nabilay onkana naanin biní na saray ának na inatey lan nantanem. Sayan gaween yo nayari met a makapangiter na biskeg na linawa ray arum a maliket met a manggaway maabig et mapaga ra labat ya mangigapo."
Sinimbang nen Ibarra rayan katunongan nen masiken, abilibilí toy kipapásen to, tan atalusan to ya anggaman makiling si masiken ed kanunotan iran mauriem, balbaleg so katuaan ed amin ya inbábaga to.
"Manisia ak ed sikayo," kuanton pinasamano. "Agak alingó ed inakar ko dian angipanon ed sikayo no panoy maong a gaween ko. Natan a tuloy onla ak ed kinen kúra ya ipaliwawak ed sikatoy kanunotan ko. No tungtongey tua, anggapo met so ginawa tod siak ya mauges, insan maong met angankon ugáli, ta aliwa met lan amin da et singa samay sakey ya amairap ed kindi amak. Sakey ni labay ko met ya kerewey tulong to ya nipaakar ed samay pangaskasíyan ya biin ambágel tan saramay ának to. Ipeket ko sirin so ilalok ed Dios tan saray totoo!"
Nanpatanir ed kinen masiken, sinmapat ed kabayo to, tan iman la.
"Manimano itayó!" kuanen masiken ya inmeremere ya pinakpaknuyotan toy matá. "Nengnengen tin maong a tomtumboken no panon kasi pangisumpal na Kapalaran ed drama ya ginmapó ed kamposanto!"
Dia balet alingon aminpinsan, ta say drama aliwa labat a diad kamposantoy ginapoan to: abaybayag lan ginmapó.
