TEKAP 24
DIAD TAKEL
Sumlang ed naugaliyan ton gendat, asaksakbay a nanmisay pari Salvi tan ginangano toran kinonpisar a nilinisay sakey a labinduan kamarerua.
Nanlapod impakabasa toy pigaran sulsulat a naawaton aliwa labat lan sinilyoan a kinaputan no ag ta nilakrian ni, singa nakal so ganas ton mangan ta pati say soklati to pinaulian ton kinmigtel.
“Agmakayari angankoy ama,” kuanen kosiniro to legan ton manggagawa lamet na komaduan losor na soklati; "pigay agew lan ag mangakan: anemiran nengneng so ipaparongok a siraen to, agto nadidiwit so ni duara.’’
“Onaa ta ag makakaugip,” kuay ebat nen ugaw to. “Mabetbet a ngalngalin naleplep nanlapod inpansalatoy silir ya ugipan to. Manaralem iray mata to, manebeng ya inagewagew, ampesisaw lay kolor to.”
Pangaskasiyan a tuay nengneng nen pari Salvi. Agto diniwit imay komaduan losor na soklati tan agto met tinawayan imay hojaldren nanlapod Cebu: akarakar a sinonunot dimad maawang a salas na konbinto ya walan sankagemgem to rad mapukepukel a lima toy sulsulat iran babasbasaen to. Diad nagugunoyan, impaisagor toy luganan to, nansalat, insan impaitolor dimad take! a kawalaan ton may kiew a nanbitkelan ton may masiken a kastila ya asingger ed sayay panpipiknikan da.
Kasabi tod man, pinapawil to lay luganan to, insan la inmotel dimad takel.
Sakey a makiskisir a dalan ya ambilbilunget ta agla lawari natatakiling na agew so tontonen ya onutel ed takel a mamaarap ed sakey a kulos a nantitiponay pigaran ampetapetang a sobol ta akamayamay irayan naalmo ed alosarsar ton man a palandey na Makiling.
—192—
