ಬೆರಿ ಬೊಟ್ಟುನ ಪಾತೆರ
ಒಂಜಿ ಬೇಲೆ ಆವೊಡುಂದು 'ಕನ ಕಟ್ಟೊಂಡ, ಪ್ರಯತ್ನ ಮಾಲ್ತ್ಂಡ, ಅವು ನಿಜ ಆಪುಂಡು' ಪನಿನೈಕ್ ಈ ಜೊಕುಲೆ ಪದೊ ಜೊಂಕುಲಿ, "ಕತ್ತುರಿ ಕಮ್ಮೆನ"ಗ್ ಮಿಕ್ಕಿನ ಸಾಕ್ಷಿ ಬೊಡ್ಚಿ. ಲೋಕೊಡು ಸಾಧಾರಣ ೭೦೦೦ ಭಾಷೆಲು ಉಲ್ಲ, ಭಾಷೆಲು ಬೇತೆ ಆಂಡಲಾ, ಅವೆಟ್ಟ್ ಇಪ್ಪುನ ಬರವುದ ತಿರ್ಲ್ ಒಂಜೇ. ಆ ತಿರ್ಲ್ದ ಪೊರ್ಲುನು ನಮನ ಅಪ್ಪೆ ಬಾಸೆಡ್ ತೆರಿಯೊನ್ನ ಅನುಭವ ಭಾರಿ ವಿಶೇಷವಾಯಿನವು, ಕನ್ನಡ ಬಾಸೆಡ್ ಪುದರ್ ಪೋಯಿನ ಪದೊಕುಲೆನ್ ತುಳುಕು ಭಾಷಾಂತರ ಮಲ್ತುದ್, ಸಂಪೊಲಿಗೆ ಮಲ್ತುದು ಆ ಮಸ್ತಿರೆನ್ ತುಳು ಅಪ್ಪೆನ ಮಟ್ಟೆಲ್ಗ್ ಸಂದಾಯ ಮತ್ತಿನ ಕಲ್ಯ ಬಾರಿ ಪುಗರ್ತೆದ ವಿಷಯ.
ಇಂದ್ ಒಂಜಿ ವಿಷಯವಾಯಿನ ಪ್ರಯತ್ನ, ಅಂಚಾದ್ ಪುರ್ಸೊತ್ತು ಮಲ್ತೊಂದು ಈ ಮಸ್ತಿರೆಡ್ ಇತ್ತಿನ ಪೂರಾ ಪದೊಕುಲೆನ್ ರಡ್ಡ್-ಮೂಜಿ ಸರ್ತಿ ಓದುದು, ಈ ಕಬಿತೆಲೆನ ರುಚಿನ್ ಆಸ್ವಾದ ಮಲ್ತೊಂಡೆ, ಇಂದೆಟ್ಟ್ ಇಪ್ಪುನ ಪ್ರತಿಯೊಂಜಿ ಕಬಿತೆಲಾ, ಕಬಿತೆ ಪನ್ಪಿನ ಮುತ್ತುದ ಸರ ಮಾಲೆಡ್ ಮೆಂಚೊಂದು ಇಪ್ಪುನ ಮುತ್ತುದ ಲೆಕ. ಕುಕುಲು ಕಬಿತೆ ಬರನಗ, ಅರೆನ ಮನಸ್ ಭಾವನೆಲೆಗ್ ಅಚ್ಚರೊಲೆನ ರೂಪ ಕೊರ್ದು, ಅರೆನ ಅಪ್ಪೆ ಭಾಷೆಡ್ ಬರಪೆರ್. ಅಂಚಿನ ಕನ್ನಡದ ಕಬಿತೆಲೆನ ಅರ್ಥ-ಸತ್ವ ಮಾಜಂದಿಲೆಕ ಭಾಷಾಂತರ ಮಲ್ಪುರ ಮಾಮಲ್ಲ ಬಿರ್ಸಾದಿಗೆ ಬೋಡು, ಪ್ರತಿಯೊಂಜಿ ಕಬಿತೆಲಾ ಮೂಲ ಕಬಿತೆಗ್ ಒವುವೇ ರೀತಿದ ಊನ ಬರಂದಿಲೆಕ ತುಳುಟ್ಟು ಮೂಡ್ ಬೈದುಂಡು. ಪುಣ್ಯಕೋಟಿ, ನಾಯಿದ ಕಿನ್ನಿ ನಾಯಿದ ಕಿನ್ನಿ, ಬಣ್ಣದ ತಗಡ್ದ ತುತ್ತೂರಿ, ಆನೆ ಬತ್ತುಂಡ್, ಒಂಜಿ ರಡ್ ಅಂಚಿನ ಕೆಲವು ಅಂತೂ ಮೂಲ ಕಬಿತೆಲೆಡ್ಲಾ ಮಿಕ್ಕಿನ ಅರ್ಥ ಭಾವ,ರಂಗ್ ದಿಂಜಿದುಂಡು.
ಇಂಚಿನ ಒಂಜಿ ಮಸ್ತಿದೆ ಅಂದ್ ಮಲ್ಪರ ಮಸ್ತ್ ಮಸ್ತ್ ಗೇನ, ಪ್ರಯತ್ನ ತಾಳ್ಮೆ, ಹದ್ದ್ ಪನ್ಪಿನ ಗುರ್ಕಾರಿಕೆ ಬೋಡು. ಶ್ರೀ ಸತೀಶ್ ಅಗ್ಪಲೆರ್, ರಾಜಬೂಡುದ ತುಳುವೆರೆ ಚಾವಡಿ ಬೊಕ್ಕ ತುಳುನಾಡ್ದ ಪುದರ್ ಪೋಯಿನ ಎಲ್ಯ, ಮಲ್ಲ, ಪೊಸ, ಪೊಸ ಕಬಿಕುಲೆನ ಒಟ್ಟು
ಸೇರಿಗೆಡ್ ಸಂಪೋಲಿಗೆ ಮಲ್ತಿನ 'ಕತ್ತುರಿ ಕಮ್ಮೆನ' ಮಾತಾ ತುಳುವೆರೆಗ್ ಒಂಜಿ ಪೆರ್ಮೆದ ವಿಷಯ. ಇಂದೆಟ್ಟ್ ಪಾಲ್ ಪಡೆಯಿನ ಮಾತಾ ತುಳು ಬಾಂದವೆರೆಗ್ ಅಭಿನಂದನೆಲು. ಎನ್ನ ಉಡಲ ಗಾಂತ್ರೋಡ್ ದ್ ಸೊಲ್ಮೆ ಸಂದಾವೆ. ತುಳು ಭಾಷೆದ ಬುಲೆಚ್ಚಿಲ್ದ ಒರುಕ್ಕು ಇಂದ್ ಒಂಜಿ ಮೈ ಕಂಬನೇ ಸರಿ, ಇಂಚಿನ ಸಾಹಿತ್ಯದ ಬೆನ್ನಿ ಬೆನ್ಪಿನ ಕಜ್ಜೊಲು ನನ ಆತ್ ಆವಡ್.
ಒಂಜಿ ತೆರಿನ ಭಾಷೆಡ್ ಪಾತೆರ್ಂಡ, ವಿಷಯ ತರೆಕ್ಕ್ ಪೋಪುಂಡು, ಅರ್ಥ ಆಪುಂಡು, ಆಂಡಾ, ಅಪ್ಪೆ ಭಾಷೆಡ್ ಪಾತರ್ಂಡ ಅವು ಉಡಲ್ಗ್ ನಾಟುಂಡು, ಕತ್ತುರಿದ ಬಿಲೆ ಬಂಗಾರ್ಡ್ದ್ಲಾ ಜಾಸ್ತಿ. ಆಂಡ ಅಪ್ಪೆ ಭಾಷೆಡ್ ಇಪ್ಪುನ ಜೊಕುಲೆ ಪದೊ ಜೊಂಕುಲಿ
ಕತ್ತುರಿದ ಕಮ್ಮನ ಬಿಲೆ ಕಟ್ಟರ ಆವಂದಿನ. ಈ ಪದೊಕುಲು ಮಾತಾ ತುಳು ಅಪ್ಪೆ ಜೋಕುಲೆನ ಉಡಲ್ಗ್ ನಾಟುಂಡು ಪಂಡ್ದ್ ಎನ್ನ ಮನಸ್ ಪನ್ವುಂಡು. ಈ ಪದ ಗೊಂಚಿಲ್ನ್ ನಮ ಮಾತೆರ್ಲ ಓದುಗ ಗಳಸ್ಗ, ನಮ್ಮ ಜೋಕುಲೆಗ್ ತೆರಿಪಾಗ. ತುಳು ಅಪ್ಪೆನ, ತುಳುನಾಡ್ ದ, ತುಳು ಭಾಷೆದ ಕತ್ತುರಿ ಕಮ್ಮೆನೊನು ಲೋಕೊರ್ಮೆ ಪಸೆರ್ಗ.
ಭಾಸ್ಕರ್ ಶೇರಿಗಾರ್
ಸ್ಥಾಪಕ ಅಧ್ಯಕ್ಷೆರ್,
ಅಖಿಲ ಅಮೇರಿಕೊದ ತುಳುವರ ಅಂಗಣ (ಆಟ), ಯು.ಎಸ್.ಎ.
83 ಕಲೆ ಸಾಹಿತ್ಯ ಜೋಕುಲೆ ಸಾಹಿತ್ಯ 83