| 4 | ЯКСТЕРЕ ТЕШТЕ. |
| Эрзень велисэ телефон. |
Ташто Захар велисэ Петровского уез. Саратовской губ. еще 1912 иестэ ушудокшность истямо тев: думасть теиме телефон. Ярмаккак 500 целковойть кучукшность Петровскоив но мезияк эзь листь те тевинть эйстэ. 1917 иестэ таго кармакшность кортамо теде, но ярмакне эсть пурнавт ды шкаськак ульнись а телефондо кортнима.
Ней жо, кода эрямось шождыньгаць ды ломатнеяк волисполкомсо ащить парт, миник появась телефон. Телефононь вельде кортыть Петровской марто, тов апак якак.
Анцяк арась велисынек электрической освещения. Эряволь бу сонгак кодаяк теивтимс, машинанть можна бу ладямс Уза вединть лангс.
Мон думан, что Белов ялгась тень эйстэяк а стувты.
Велинь ломань.
| Эрзень спектакль. |
Июнь месецень васенце числасто Петровскоень педтехникум тейсь выпуск. Тень кувалт чить ульнесь торжесвенной заседания, а чокшне тейсть спектакля. Налксесть „Эрзянь свадьба“ (Пиесанть ученикне сынсь сочинили). Налксицятне ульнесть: 18-во педтехникумонь ученикть и 1 велень ава. Одижатне невестанть лангсо, тейтертнень и аватнень лангсо ульнесть эрзянь: викшнезь панарт, руцят и икильга-пацят, а прясост аватнень ульнесть пангк.
Кулцуныцятне больше ульнесть руст. Кулцуность весе кургонь автезь. Налксимась и пиесась весеменень мельзэст тусь: занавесэнь нолдамодо мейле кувать кецэст цяпасть и сеересть: „браво, браво!“
Свадьбадонть мейле тусь концертное отделение рузонь и эрзянь моро марто. Эрзякс морасть колмо морот:
1) Вирь чиресэ,
2) Лугава яки сыре а лаша
3) Маря ашти чаво банясо.
Моротне листь пек мазыстэ.
Ив. Прокаев.
| Тееде товарищества. |
Ташто Дема велись покш, ды ладузо апошке. Беси сокеть-видить сюро, моданок жо пек аламо. Сокамо якить васув: 40, 30, 25 вальгий петь ды модатнеяк залежть и сех береть. Лия ремесла кодамояк аздыть. Мон думан — седе бедной велить арастькак.
Авасуло миник эйстэ, ули вирь. Можна бу уливель тейниме чарыть, нурт ды ламо кой месть. Ули сёвонь — можна бу тейниме кирпицть, но кияк а тейне мезияк.
Монень маряви, что те тевинтень эряволь бу кундамс товариществанень. Теиде товариществат, Ташто Дема велинь эрзят!
| Паро председатель. |
Революциянь васинь читнень эйстэ и те шкас ламо ульнисть миник председателть и председателень ялгат, но пек парт арасилть. Ней анцяк парт годявсть. Председателекс миник Щеголев ялгась, а председателень ялгакс Учинин. Тевист тенть сынь, кода эряви, самогондо симимадо а некшневить. Уливилть бу истят постоянна, тевинек туивелть бу парсте ды ломатнеяк трокс авулть вант бу лангозост, кода те шкас ванцть.
— Мезинь паро учат властенть пельде — кортнисть икиле — анцяк козой конань кочкасызь, карми симиме ды саиме.
А сень а содасызь, что минь сонзо кочкасынек яла апак вант.
Ламине бу истят ломать советской учреждениява, кодат миник председатель ялганзо марто.
Н.
| Кармамс эрзякс тонавтниме. |
Неклюдовской волостьсэ Ардатовск. уез. Ульяновской губ. ульнись эрзень собрания. Пуромкшность тозонь ламо эрзят. Ульнисть тосо и Анашкин ды Максиматкин ялгатне. Рускс а маштыть кортамо, эрзень кель а вечкеть.
Анашкин мере:
— Ней, монь койсэ, стувтомс бу эряволь те кортамось.
Сонць азды, кода рускс мереть скалунтень.
Председатель волисполкома Максиматкин мере:
— Совсем ликвидировать те келесь.
А Кочетков, Карнаухов ды Наумкин ялгатне мереть:
— Коли а маштадо а рускс а эрзякс, сестэ васня тонавтнеде эрзякс, а мейле уж рускс. Седе мейлеяк а позда ули кортниме, кодамо кель миненек эряви.
Эрзетне пуцть и протоколс сермадызь, чтобу тонавтнимс эрзякс, а Челпановасо теимс эрзень педтехникум.
Неиця.
| Церькуваст лемдизь. |
| (Атраць веле, Ульянов. губ.) |
Атраць велесэ аволь умок атетне тейсть пек паро тев. Путсть лемь церькуваст тортов. Лемдемстэ симсть ламо самагонка ды иритсты мейле валяесть «пазонь кудонь» киякска.
Кармакшность велезэст школань сроямо, кона нейгак эще яла апак пряд.
Паро тев тейсть эрзят. Можна меремс вицтэ понгить райс.
Знярдо, эрзят, школанк кувалт карматадо арсеме?
Кувать эще кармить попне прясонк колиянь сювномо?
Андрей.
| Тейсь салава — лиссь лангс. |
| (Артель Муравей, Бег-Абукановской вол. Стерлит. кат.) |
Коммунист Левань Пале (Сараев) од чачузь эйкакшонзо вознесениясто лемдизе. Чтобу ломать авулть содак, лемдицетнень (кумт кумат) сайсь лия руз велистэ. Рузунь лемдицят сайсь еще вана мезинь кувалт: руснэ казнить а саить, сынст арась истямо кой, а эрзетненень эрявить казнить. — Мелем молць эрзень казнимадо — мере сон.
Казнитнеяк теть жалть, лемдимскак теть нельзя, так а седе паро ли уливель теть а лемдиманзо? Сараев ялгай! Отвечак весе „Якстере Тештень“ ловныцятненень.
Сед-ри.
| Крандазцо сорновтниват, а автомобились арась. |
| (С.-Кармалинской вол. Бугурусланск. уез. Самарской губ). |
Миник волостьсэ июнень васинь читнень эйстэ ульнись переучет алашетнинень. Сех икиле кармасть примамо Сок-Кармалань велинь, вансть ветеринарной доктор марто.
Ташто Борис велисэ эри алашень фельдшер, кона мельга и кучсть подвода. Молць Захар атя и тердизе волостев алашень примамо. Сон варштась лангозонзо, а мейле алашенть лангс ды мере:
— Мон а молян тыненк крандазцо, эряволь бу тонеть самс дрожкасо.
Чарась, чарась атинесь и мекив кеветие вальгий петь сась кудов чаво. Амбоце чистэ якасть уж мельганзо дрожкасо.
Вана кодамо бояркс велявсь эрзянь скотинань фельдшерось, что крандазцо а моливе и кирць истяк мужикнень кавто чить алашаст марто. Может сонензэ эряви автомобиль рамамс, ата дрожкасояк, пожалуй, якамо а карми.
Вана кода миник эрзянь интеллигенциесь нарьгиде эрзетнень лангсо. Те ломаненть умук бу эряволь тулкадимс таркастунзо ды аравтумс лия, седе ен.
Кармалань эрзя.
| Эрзянь газетантей „Якстере теште“. |
Май месецень 11-це числасто, 13-це №-цо статьясо: „Амаштувикс учительница“ ки буте сермаць минек практикумонь учительницанть коряс, что буто сон путне эрьва кодат обидной прозвищат ученикензо туртов.
Минь, весе сонзо ученикне подтверждаем, что се сермадумась ульнесь весе неправда, мезень кис и сермадтам леменек и фамилиянок.
А. Пятаев, К. Левашкин, В. Любушкин, В. Кондрашов, Е. Скобелев, Н. Скобелева, С. Мартынов, Б. Потанин, В. Мартынов.
| Сермань парго. |
Прокаевнень (Петровск). 1) „Сборник вете годонь Совнацменэнь тевть Наркомпросцо“ эзь листь, ды а лисияк. 2) Журнал „Народный учитель“ кучить ютазь месецень кискак, 3) Эрзень кинижкат, кодат вешить, кучтано. Статьят кучнек маркавтомо.
Долговнень (Айлина). Газет кучинек. Сермат, кода эрить тосо эрзетни. Евтнек лиянень газетнень эйстэ. Кода мелезэть тусь газетэсь. Улить эрзень книгат. Ловныть газетнень об‘явлениятнень.
Егоровнень (Бузулук). Газет кучинек. Евтнек лиянень штобо, сермадстост эстест. Сермат статьят тей, кода эрятадо.
Кочетовнень (Петровск. у.). Ярмак теть кучинек, зняро ульнесь по ведомости. Курук эще получат.
Чатуровнень Ф. Ялгай, миньденек стяко а максыть кинигат, а то бу кучувлинек. Газет кучинек. Сонензэ питнезэ анцяк 15 трешник.
Сед—ри. Эрзень букварь „Тундонь чи“ кучовлинек, ды минек арасть. Сексня, наверна, кармить печатамо ды кучсызь школава.
Редакциянь пельде. Кемсисемеце номерцэ Евсевьев кувалт Кручининынь статьясо ве таркасо меньстевсть вана кодат валт: „Центральной эрзень — мокшонь роботникненень эряви хлопочамс тензэ пенсия“.
| Издатель: | Ответственный редактор: | |
| Центр. Издательст. Народов СССР. | Т. Васильев. |
|
|
| Главлит № 20.011. Москва. | Типография «Красный Восток», Никольская, № 10. | Тираж 1000. |
