| 4 | ЯКСТЕРЕ ТЕШТЕ. | № 17 |
| ВЕЛЕНЬ СЁРМАТ. |
| Ульяновской губернява. |
| Ки чумусь? |
Чукал велесэ (Ардатов. у.) улить учитель ды учительница, кода мерить — кавто карть-карцимат.
Сынст эйсэ яла эрьва велистэ пансть, козойгак эсть ладяв. Уоно ней кучинзе эрзя велес Чукалц.
Сынь ней тосо эрить, вейке занизе квартиракс учильнянть, омбоце учителень квартиранть.
Чукалонь председатель, мекс кашт молят, умок эряволь уш сермадомс уононень.
Советской власть нузякст а вечки андомс.
Эще паро учительница Ксогор велесэ, кона анцяк манчи эрзя аватне эйсэ орожиямосо.
Сонзэ эйстэ ульнесь сермадозь газетс, а сон яла теке брожии.
Заня.
Редакциенть пельде. Редакциясь кучсь серма Симбирень эрзень секциянтень, чтобо неть учительтнень ды учительницатнень тевест ланкс парсте варштамс. Анцяк тевесь истя ашти, то кравтомс сынст школатнинь эйстэ.
| Паро тев. |
Кочкор велесэ (Симб. губ.) 60 ломань эсь охотасост стявнесть ульцянь кувалт колмо кварталга 400 каль чувт. Те паро ушодксось (починэсь) вадря ванссыцякс ули пожар шкане. Эряви остатка эрзетьнененьгак истя теемс, ато якстере атякшось киньгак а жали.
М. Наумкин.
| Ве тарказо берень. |
Найман велесэ (Корсунск. у.) ули учительница Смутовина. Сон уш комсешка ие тонавты те велесэнть. Ломанесь паро ды тонавтыяк парсте. Пичеурской ВИК тензэ сёрмались покш пасиба. Анцяк пазозо кодаяк астувтови. Лиясто вант обедняв моли кудозонзо попкенть нолдасы пазава марто.
Те тунда сон якась пакшатне марто вирев (экскурсияв). Сон тосо пек ве церыненть канфузизе, кода неизе, што сонзэ арась крестоза.
Церынесь кудов сась и мери: „Дайте монень крест, а то пек учительницась покордавсь, што арась крестом, а мон яла теке паз а кеман.“
Роботанзо кис пасиба, но свежа пакшань превть аэряви мутямс пазонь качамосо. Тонсь уш майсек пазот марто, а пакшат иля чаракавтне.
Эсь велень эрзя.
| Саеде пример. |
| (Ал—веле, Ульяновской губерн.). |
Ал—велень ячейкась кундась паро тевс. Тейсь политкружок, кона эрзенень ловны сынцист кельсэ докладт. Ули литературной кружок кона, нолды эрзякс журнал «Од Ленин» ды газета (стенас педявтнима) лемезэ, конань «Од Кортлиця». Аволь умок тейсть кружок самообразования, конасонть тонавтыть эсь пряст эрзят. Ули драматической кружок. Празникстэ тейнить спектакольть учильнясо. Пек парсте стараи ответств. секретаресь.
Сермадыця
| Комсомолец. |
Паро Ал—велень ячейкась, роботыяк парсте, но ули тосо комсомолец Володяшкин, косто—косто муи самагоннэ ды истя копори, што весе ячейканть срамавсы.
Паро ячейкасо истямо член аэряви кирьдемс.
Тазов реве — весе стаданть гадясы.
Од Сермадыця.
| Самарской губернява. |
| Мекс тефтне беренстэ молить |
| [Секретарской вол. Бугур. у.]. |
Минек волостьсэнек роботыть буто парсте, а тевесь ащи аламодо берянстэ. Ней волостенть саизь лияв — руз велев. Волостной председатель ялгась Облаев слабостэй аламодо вети тефне эйсэ. Можот анцяк скамондо роботы, секс тефнеяк састо молить. Омбоце член дух а роботы волостень тевсэ, а колмоце аламодо самагоннэде копори. А кода горякады, моли церькував, ары крылосс попонть марто помоги.
Ульнись кооператив, ней анцяк беренишка лавкине кадовсь.
Остаткань пелев ячейкаськак нузялгаць. Ульнесть паро роботыцят — тукшность.
А комсомольской ячейкась тожо беренстэ кармась шатамо. Комсомолонь секретаресь нузялгаць.
А ну-ка, волостень роботник, седе сорновтоводо ды кармадо енсто роботамо.
Ванькань ялгась.
| Думасть, думасть ды думазевсть! |
| (Секретарской вол. Бугурусланской уез. Самарской губ.) |
Минек волостьсэ ульнесть тельня учительтне и учительницатне пек слабойть политической воспитаниянь кувалт и весе сынь арсисть понгомс кизна курсос тонафтнеме. Курснэ уездсонть веенцт, саить как тозонь аламо. Ванцть сынь да и думазевсть, што лучи ули, коли миньциник волостьсонть тейтяно эстенек аволь покшкить курскеть. Думасть, думасть, да и пурназевсть ве таркас и тейсть колмо недлянь курст. Не курснэнь эйсэ сынь сынць тейнисть доклад и сортувасть эйсост. Хоть аволь ламо кармасть содамо, но сетэке кой мезе содыть и кажной мери, што минь сень тонафнинек эсь юткованок и аламошкадо содасынек тевенть.
Пек парсте тейсь Секретарской волостень учительтне! Ежели кажной годнэ знярошка хотя ютыть, то ниле—вете гоц кармить минек тонафтыцятне пек ламо содамо политикадонть, а советской Россиянтей истят тонафтыцят только и эрявить. Сок - Кармалань учительницатне тоже истя думасть шканть ютафтомс, но аздан кенерить арась теиманзо сексес.
В. А. Платонов.
| Попонь инечи. |
| (Афонька веле, Бугульминской кантон, Татреспублика). |
Инечистэ миинк попось якась велева пурнамо. Мельганзо улав. Эрьва кудосто сон сайсь мезеяк ды нолдась киргапаризынзэ чапамо ведь (рускс самогонка). Улав марто якицесь тожо эрьва кудосо нолцись стопканть. Кавонест иридсть. Попось мадсь коник лангс ды кармась морамо мининь-зюнонь морот. Улавонь ускицесь пурдызе алашенть, мадсь улавс ды укснувсь тозонь. Улавсо ульнесть сюрот ды кшить. Веси попонь пурназь паро чинзэ укснувкссо ваднизе.
Велисэ пейдить лангозост.
Попнинь эйсты басить, што сынь колияк а пещеветь. Паряк ней укснувкстныде топоди.
Ютыця.
| Лия таркава. |
| Пяндя удомс, — эрямс эряви. |
| (Каменка, Бижбуляковской вол., А. Б. С. С. Р.) |
Минек велись весимиде покш. Эрить 282 кардаз 1800 ломань марто. Ташто пингева ульнесь двухлкассной* школа, конань эйстэ ламо лиссть эрзень учительть. Те велинтень, кода мереть, улималь бу развитойкс. А сон несак таго кода седеяк удалов кадовсь. Васня ульнись библиотекаст, косто од цёрат-тейтирть сайнисть книгат ловномс. Ней библиотекаст арась. Культурно-просветительной куракшост тожо арась. Вейкияк газета а нееть. Эрить дедаст-покштяст койсэ.
Месть тейнить од ломатне? — Самогондо симить ды улицява дураськалить.
Но, кода руснэ мереть „арась берень паро тевтеме“, вана мезинь кувалт народось тусь мелезэм: ульнинь сынст пуромкссо. Пуромкссо ульнисть и сыре и од ломать. Кортынь эрзень „Якстере Теште“ газетанть эйстэ. Вейкинь пес пуромксось дружнасто кармась арсиме, кода бу сёрмадстомс эрзень газета. Мерсть, чтобо комитет взаимопомощи сермадстуволь сыненст „Якстере Теште“.
Те пуромксось ульнись март месецтэ, а комитетэсь уды и газетанть онстонзояк а несы сонць и велинтеньгак а невцэ.
Арювынь нуцька.
Редакциянь пельде: Каменкань эрзят! Явавтынк комитетэнь удоманть. Тынстеминк сон а сыргузи. Коли тыненк а сыргустиве — „Якстере Теште“ удоманзо явавцы.
| Вана кода эряви эйкакшнэнь тонавтомс. |
Аумок Лукьяновкав сакшность экскурсиякс Ламбаськинь эйкакшт: сисемшка церынеть ды ниле тейтирькат. Ардсть сынь кшнинь киява 90 вальгий петь. Завнацмен учительницань марто ветнесть сынес Лукьяновкань учреждениява. Эйкакшнэнень пек мелезэст тусь радио-телеграф. Заведующеесь евтнинзе сыненст, кода сон роботы, кода тесэ кунцулыть Московсто морот... А сех пек паро сыненст марявсь кшнинь киява ардомась: сынь ощо эсть некшне колияк машинанть и ардомсто вейкест вейкенень кортасть: „а онстон ли неян истямо штука?“ Алкукскак чись ульнись маний, лембе; киява понгокшныть вирнить, паксят, лейнеть... Велинеть куруксто появакшны и истя жо курксто кадувкшныть удало. Атетни-покшетни алкукс онстосткак колияк эсть некшне истят крандтст-лишметь. Ара яла сыре пингстэ ирицтэ кодамояк атя пренть ковгак лейс эцисы, а мейле евтни, што шайтянусь сонзо колмошка сядт вальгий петь кандсь; анцяк кода сон мерць „Осподи“, шайтянусь тулкадизе лейс.
Ней уж эйкакшнэ а кемить истят евкснынь. Сынь содыть, што кодаткак шайтят арасть, ули анцяк ломанинь прев, конатась кепиди ломаненть менильц, пани ведьга пароходт, кшнинь киява машинанть, истя жо куруксто, кода атетни ирицтэ ливтильть шайтян марто.
Сардо.
Редакциянь пельде. Ен тевинть тейсь Лукьяновкань Завнацменэсь. Ламбаскинь эйкакшнэ те парунть а стувсызь.
Эрявуль бу веси уездга тейме истят ежо экскурсият.
| Сермань парго. |
Наумкиннэнь. (Кочкуров веле, Ардат. у.). Сермат получинек.
Те номерсэнть кой кона статьят печатынек, остаткатне улить нолдазь мейле. Гонорарот кис кучтано теть кинигат ды газет. Художественной роботань прибордо сермадтам омбоце номерцэ. Кевксцынек кодат питьнест.
Ключовкань комсомолецень ячейкантей. Од закон модант кувалт кучинек. Курок получасынк.
Тееде велезэнк корреспонтденской кружок.
Ильдяровнень ды Макаровнень. (Мордов. Дмитриевка). Те газетсэнть ули об‘явления, косо евтазь кодат кинигат улить эрзень кельсэ ды кодамо питьнест.
Тееде корреспондентской кружок. Кода роботамс, тень кувалт кучтано инструкция.
Куликовскойнень. (Ташкент). Газет кучнеме карматано. Седе тов кучт ярмак. Питнезэ дешева.
Паро бу уливель, штобо тонць кармавлить сермадомо. Учутанок пельдеть серма, кода тусь мелезэть газетэсь.
Филатовнень. (Казань). Кинень тон вешить кучумс газет — кучинек. Карточкатне берять, улевелть куш мала—дела, то печатавлинек. Те пек паро тев улевель. Автономиядо кармавт сермадомо эще. Минь тесэ пурнатано материал. Седе тов сайдяно ЦК-сто разрешения, штобо те тевденть газетсэ кортнемс.
| Издатель: | Ответственный редактор: | |
| Центр. Издательст. Народов СССР. | Т. Васильев. |
| СЕРМАДСТОДО ЭРЗЯНЬ ДЫ МОКШОНЬ ГАЗЕТ. |
| „Якстере теште“ | (эрзякс) |
| Москва, Никольская 10, комната 17. | |
| „Якстере сокиця“ | (эрзякс) |
| Саратов, Губком РКП. (б,) Мордовская секция. | |
| „Од веле“ | (эрзякс) |
| Петровск, Саратовской губ. Уком РКП. (б.) Мордовская секция. | |
| „Од веле“ | (мокшокс) |
| Пенза, Губком РКП. (б.) Мордовская секция. | |
| Главлит № 20.011. Москва. | Типография «Красный Восток», Никольская, № 10. | Тираж 1000. |
