| 2 | ЯКСТЕРЕ ТЕШТЕ. | № 16 |
| Петровской эрзянь-мокшонь педтехникумдонть. |
Июнень васенце чистэнть Петровскоень (Сарат, губ.) педтехникумстонть нолдыть эрзень од тонафтыцят.
Те покш учильнянть Советэнь властесь казизе эрзень-мокшонь народонтей 1918 иестэ.
Кото иеть учость эрзят-мокшот эсь од учителест. Ней учовсть. Сексня не од роботникнень эрзень—мокшонь организациятне кучсызь школава работамо, эрзянь-мокшонь чопуда чинть марто бороцямо.
М. Кручинин.
| Советэнь Масторга. |
| Эрзень коммунистэнь пуромкс. |
Лукояновсо, Нижегородской губ., 17 июня, пуроми эрзень коммунистэнь пуромкс. Пуромить веси Нижегородской губерненть эйстэ эрзят-коммунист.
Кармить кортамо:
1) Кода эри Советэнь масторось лия мастор марто.
2) Доклад Губкома РКП. (б), кода роботасть:
Арзамазонь, Лукоянонь и Сергачинь уездтнэ эзга эрзя юткова.
3) Доклад тонавтнима тевдинть.
4) Велинь партиень роботадонть.
5) Совэтэнь роботодонть.
Арситям чумбра чи эрзень коммунистэнь пуромксонтень.
Т. Васильев.
| Московонь театрасо морыть эрзень морот. |
Московсо ули театр „Мейерхольда“. Те театрасонть те тельня налксисть яла рузонь комедия (пейдима пьеса) „Лес“ — Островскоинь. Налксимань кунчкасо морыть эрзень морот. Морасть, эряви меремс, беренстэ. Московонь эрзень студентнэ тейсть эрзень хор (морамо куракш). Те куракшонть эйсэ регентэкс А. П. Рябов. Эрзетни ней ряц якит морамо эрзень морот.
1 июня эрзетнинь тердизь морамо политехнической музейс, косо морасть ды ловность 26 нация.
Тесэ ульнись тонавтома тевинь народной комиссар А. П. Луначарский.
Эрзень моротни моравсть весимиде парсте. Эрзетни ульнисть нарежезь ташто эрзень коинь панарцо.
Кабу эрьва таркава морамо тевись аравтомс Московонь лацо.
| Профессор Тутышкин. |
Московонь медико—педалогической институтсо ректорокс ашти профессор Тутышкин. Те ялгась эрзя. Ней сонзо кучизь лия масторов тонавтомо тевинь кувалт. Тутышкин ялгась те кизна яки Американь городга ды ловны лекцият. Авуль уж овсю эрзетни берень ломать, ютксунок улить истят эрзят, конат американицыньгак кой мезис тонавцызь.
| Бесплатной подводадо. |
Губернясто ды уездстэ кевкснисть, косто саемс милициенень подвода, будимкс сонензэ эряви ковгак молемс служебной тевень кувалт.
Народный Комиссариат Внутренних Дел мере, что милиция может якомо бесплатно анцяк тосо, косо ули трудгужповинность. Будимкс истят тевть арасть, сестэ милициесь сивидезэ подвода. Ярмакт неть росходтнень лангс должен максумо исполком.
Те положениесь сермадозь а милициень кис анцяк. Коть кодамо служебной ломань улизэ, сонзо праванзо истятжо.
| Рускс а маштыця красноармеецнэнь кармить тоновтумост эсист кельцэ. |
Ламо кортасть сень эйстэ, кода ветямс политработась красноармеец марто, конат а маштыть рускс кортамо. Ней пуцть истя: неть красноармеецнэнь тонавтумс грамотас сынцист кэльцэ, аравтумс сыненст тонавтыця — политработникт, конат содасызь эрзень, татарунь эли чуважунь келенть. Теить библиотекат, косо кармить улиме сынст кельцэ кинигат, газетат.
Библиотекас аравтыть вейти-вейти ломань, конат маштуволть кортамо красноармеец марто эсь кельцест.
| Мекс а пачколи минек „Якстере Теште“. |
Авол умок ульнинь Стерлитамаксо. Совсинь чувашунь секцияв, тесэ маринь, што „Якстере Тештень“ редакциясь Кантонной Партийной Комитетс кучни газет, эрзетненень явшемс. Газетнень макснесызь Чувашунь Секцияв, кона эйсэст кучни волостной парт. комитетнэнь ланга. Тосто явшесызь ячейкава и эрзень коммунист ланга. Лиясто агодявить ячейкас эрзят, газетнэ истяк валяить, мейле таргасызь.
Минек велесэ коммунист Левань Пале ячейкасто сайни эрва номерэнть эйстэ. Сон сайнесыньзе аволь ловномс эли лиянень явшемс. Ломань пингстэ пейдикшны газетэнть лангсо, ды эрзень келенть лангсо. Улить истят жо пейдиця ломать эще, но улить конат радт ловномс сонзэ.
Аздан, умок ли парсте тонаць русскс басямо Пале, Те уж коммунистнэнь виськс истя тейнемс.
Сон аздасы, месть корты тень кувалт партиясь.
Сед-рий.
Редакциянь пельде: Косо ощо улить Левань Палень кондятнэ? Сермадодо редакцияв.
| Вот таk сороkоуст! |
Тевесь ульнесь Ашо—Ведь велисэ, Коржевской вол., Корсунского уезда, Ульяновской губ.
Те тунда сокамсто алаша куломс чавсь ломань. Кадовсть сиротакс козийказо тейтерне марто ды сыре сокор авозо. Калмизь, поминызь. Ней эряви служамс сорокоуст грешной ойминзэ кис.
Попось мере, — церась кулось апаро куломасо, сонзо кис седеяк пек эряви озномс ды сонцькак уж попось седе ламо трудат путы сорокоустонть служамсто. Аватне талакацть. Мезе пандыть попонтень? А попось уж маресь, что церанть ульнесь паро суконной пальтозо и ладесть те пальтонть лангсо. Но пальтось вейке, а служицетне кавто: поп ды диячек. Кода теимс? Мольсть еще местькак вешиме. Бабинесь мольць шабранень советэнь кевкстеме. Сась тосто, кильць алаша ды адя омбо велен попнень, сон, коля, седе дешевасто служи сорокоустнэнь. Тескень попось кеждесь ды мере: „Кадык ино сестэ монень илязо сакшнок, кадык просвирань служавтомояк яки лия велев“.
Тандаць бабась и максынзе весе, месть вешсть кецтынзэ. А вешсть сынь а пек ламо, анцяк поддевка, сатиновой понар ды 10 арчит коцт попонтень пальтонь таркас ды чапат диячеконтень.
Паряк церань ойминтень паро ули тона чисэ питней сорокоустонть эйстэ мейле, а сех паро попонтень.
Ашовединь эрзя.
| Вейсы-вий. |
I
— Ве паро ломань а сови тынк кооперативезонк, — мере Остай атя.
— Дуракусь бути а сови кооперативезонок, — отвечи Остайнинь Кирмалов Сема.
— Монь штоли ловнат дуракукс? — кевкстизе Остай.
— Авуль тонь, Остай, тон эсь пачкат пек превият. Кооперативенть а вечксак секс, что тонь эсить лавкат ули, тонеть веси барыштне молить. Кода теиве кооператив, кияк тонеть рамамо а моли, кармить рамамо потребиловкасто.
Истя басить эсь ютковаст Остай ды Сема. Остай, Каргунь велисэнть весимиде сюпав ломань. Кирди кавто работникт. Аумок тейсь велисэнть лавка.
Сема ломанись бедной ули ве алашазо, сеяк эль урады коромтомо. Сема ней велисэнть арси теимс потребиловка, а Остай пек сепи те тевинть. Моли потребиловканть карчо.
Сема онстонзояк яла теи велисэнть кооператив. Велись таго-кода а пек дружнасто кунды те тевинтень, — пелить Остайди.
— Кооперативесь паро тев, но кундамс пелян, Остай кежеявты лангозом ды мезияк а максы долгс, — истя баси Семанинь Курця Федя.
— Учусынь аламошкас красноармеецэнь, — думи эсь пачканзо Сема — велявтыть салдатсто, сынь седе ламо толк содыть, ды Остайдияк а тандадыть.
II
Сась тундо. Иничинень появасть кеминьшка солдат. Кевкснисть кода эрить. Седе мейле тейсть пуромкс. Салдатнэ веси кортыть эсь ютковаст дружнасто. Кортыть превийстэ, Советэнь праватнинь содасызь парсте.
— Ней Остайди а пельтям, салдатнэ маро минь сонзо киртясынек, — кортась яла Сема.
Пуромкссонть кортасть модань явшимадонть. Остай виздилгавць атетнинь, что сынь беренстэ пандыть попонтинь жалованья.
— Те страм, — мере Остай, — духовной наставникенек равужо кшиде ярцы, роботник сонензы а мези лангс сивидимс.
— А тон, Остай, максык попонтень тонцить ве роботникенть, коли пек жаль маряви. Тонь ощо вейки кадови, — мере Яхим.
Яхим анцяк сась службасто. Церась бойка. Службадо икеле попонь кецэ роботникекс эресь.
— Аволь поптонть, дайти ка потребиловканть кувалт басясам, — рангстась Сема.
— Ули ведь велисэнек лавка, торгови Остай ды ладна. Мезинь ощо тенк потребиловка? — пшкаць Остаинь кумозо Наум Кириллович, кона ташто пингева ульнись Тарвазовской волостной писырекс. Ней велисэ псаломщикень таркас арась.
— Шайтян-шайтянунзо кис эрьва косо пшкади, несак Кириллыч Остаинь кис, а Остай ванодо Кириллычень кис, — мере отпускной солдат.
— Потребиловкас путынк ярмакунк, кияк мартуст оргоди, вот тенк ули каператив, — угулсту рангстась Лени Миро, Остаинь работникезэ.
— Тон, Миро, тонць бедной ломанись, а аштят Остаинь кис, — мекс истя?
— Миронь кондятнэ кармить Остаинь удалксонзо нолциме.
— Монь койсэ, — корты Саразатя, — каперативесь истямо тев: ней вана минь раматам таварунть Остаинь лавкасто. Остай саи пельденек барыш, тенстеме сон а кармаволь торговамо. Каперативесь минцинек лавка, веси барышесь кадоволь минцинек зепс.
— Саинк вана те тенстенть ды терявтынк синдинк, — киненьгак а синдиве. А кода илевтнинь вейти-вейти сайсыть, веси тенстесь синтриви. Истя Остайгак эйсынек, вейти-вейти остатка трешникенек тарги. Кода ули каперативенек, — сестэ Остайнинь а макстам пря обижамс. Минь коли вейсы — киненьгак а изнявтам, а коли ськамонок — эрьва ки может минек ялганть пря бокава лыкштадимс.
— Тонь, Сараз лелей, вант ва Остай лыкштатьтянзат пря бокова, — мере Яхим.
— Остаинь ней кедензэ нуркинеть монь лыкштадимс, Кириллыч ней ведь авуль волостной писарь, а посаломщик анцяк.
— Минь пшкадтям кисыть, Сараз лелей, — мерць ве салдат.
— Мон монцькак а пелян.
Пуромксось решил теимс велисэ кооператив. Сема радувазь тусь кудов.
III
Омбоце чистэ Семань кудусо пуромсть веси солдатнэ. Велива ки а юты, Семань кудонзо ваксска лотки.
— «Те а война-ли кодамо уставить, зняро салдатныде» — думазиве эсь пачканзо ютыцесь. Алкукс, Семань кудосо пуромсь цела рота салдат.
— Ну, ялгат, тынк марто тевись туи. Тынстименк ход арась Остаинь кондятнэнь эйстэ, — мере Сема.
— Ней минь а макстам Остайнинь ход, — мере Яха.
— Ну кода ней тевинтень кундатам, — мере отпускной солдат.
— Мон мартун ускинь салдатсто кооперативень устав, сонзо кувалт...
— Правленияс эряви кочкамс минциник ялгась, — мере ве салдат.
— Семань, Яхань ды Сараз атень кочкасынек, сынь тевинть ладясызь, — мере салдат, — кода Правлениенть карматам кочкамо, дружнасто кундатам те тевинтень, ата ощо улить дуракт, конат аштить Остаинь кис.
IV
Карго велисэ ней торгови потребиловка. Остай пекстэзе лавканзо. Остай, Наум Кириллыч ды попось кой кува яла онгить потребиловканть лангс.
— Антихристэнь лавка тейсть велисэнть, а крест а пазават а микшнить, — кортыть сыре бабатне.
— Коперативесь тейсь Карго велисэ паровой мельниця. Ней кудотни эзга аравтыть электричествань лампат.
Кириллыч курук попокс ары. Остап лавканзо пекстэзе, ней самагон пани ды торгови ощо пазавасо, свечасо, самагонсо...
— Вейсы-вий, — эрьва кува пижни Сараз атя.
Тимо.
