— 7 —
Вихца эцевсь латалу и исця марэ сонцкэ, кода шашць тишетнень потмос.
Кирендезнь пильгонзон и сембэ вастонзон кода сель. Марясы — валом-валом кармась эжма и эжмоть лангс матодовсь,..
Тифтець бта „по белому“ куд. Потмоц урядаф-урядаф, костонга фкэ сорнэ аф нэят. Стенанза кутть акшот-акшот, кода тялонда ловсь. Азорсь озаф моркш (шра) ваксс и кинига морофты, а иденза озсофтфт перьфканза и кульхозондыхть.
Алэть сакалоц акша, шэерец прэ кеденц ланкса аш, вадяв пряц кода сиэнь зага пиндолды.
Азор авась акша щамса (панарса) пэнокуд инголэ шары — пачат пици. Морафць тийсь атэсь, озсость сембэ моркш ваксс пачада ярхцама.
Тюлэй ваны да сельгонянзон эса нилнди.
— Вов кда озафтолемэзь пачада ярхцама, — мэляфты эсь пачканза.
Ваны — ашка сакал атэсь стэсь эсь васцтонза и моли теезонза. Кундазэ кэттэ и сонць лэпэ валняса пшкэць.
— Озак, цёранэй, пачада ярхцама!..
Пачатнэ ватьфт кафта пэльдэ — эхэрь тракс вайхть. Тюлэй кода вачода чавка, кармась нилендема пси пачатнень эзда.
Ваксозонза улсть озафтфт азорть иднянза. Сэшкат-жа конашка и Тюлэй. Шамасна вадяфт акшет. Прясна сейнтьфт ваднявста и вайса ватьфт. Ярхцахть синь и аф ваныхть Тюлэйнь ланкс.
Азор авась изь кенерь пси пачань каннема. Тюлэй синди, да лофцти навасы пача пенц.
Эх, и танцти тяфта! — арьси эсь пачканза, — эряви цэпозон путомс.
