Осипов стясь, каизе лавтов ланганзо каладышка пинжаконзо.
— Адядо уш, молян, мезе ансяк монь пельде лезэсь?..
— Лезэсь весемень пельде зяро. Молемс эряви, может алкукскак мезеяк вадря теить.
Лись Маша ломантнень ютксто ды кежейстэ эськельдязь тусь икелев.
— Вана авась... — Эщо мезть бути кортыксэль Коля Абрахимин, буйкстась келезэ, силой нилизе сельгензэ ды пшкадсь: — Адядо, а мезть учнемс. — Сонсь истя жо, кода Маша келейстэ эськельдязь тусь мельганзо, куш аволь мельсэ.
Весе члентнэ сыргасть промксов. Промксось ульнесь яволявтозь конторантень, заведующесь эзинзе нолда.
Ломантне яла промсть. Катя, прок нарвицька ципаканзо ютксо, ков туи — тов мельганзо либурдыть.
— Ладось ковгак а маштови, а косо ютавтомс промксонть. Директорось таго эзимезь нолда, ков ней молемс?
Катя палсь пси толсо, куратной рунгозо свечакс видемсь.
— Мезть ней тейнемс? — таго рангстась Катя.
— Сралемс а эряви! — мезе ульсь виезэ рангстась Зюзин.
— Онот Самарканть чиресэ олгонь шалашось, адядо тов.
Зюзин сыргась, мельганзо пиксэкс таргавсть мельсек-мельсек тусть шалашонтень.
25
