— Давай, Катя, пурнатанок союзонь промкс, сёрмадтанок постановления, штобу минек совхозс панжомс ларёк. Вачо робочейтне тенек а кирдевить, сралить ков понгсь, ёмить весе эмежтне паксяс. Кулсономак, Катя. Совхозсонть покш обезличка: кияк мезень кисэяк а отвечи, роботыть чисэ. Те аволь робота — ансяк пряст кайсить тей-тов, штобу чись ютазо седе курок, сдельщинадо кияк а содыяк. Бути робочеенть улеме кармить истят эрямо условиянзо, сонзэ кедьстэ а кода ды а кона ёндо вешемс вадря робота. А ули се шкас ударничества, зярс администратортнэ а ютавтыть единоначалия, зярс арась вейке отвечиця тевенть кис. Думак тонсь, Катя, истя роботазь, кода роботатанок ней, совхозось калады. Прок саразт почаксыть, ве таркасто — туить омбоцес. Истя вана моли тевесь, истя роботыть минек робочейтне. Ки чумось? Чумотне минсь. Минь эщо а машттанок вадрясто тевень ветямо...
Катя яла кулсонось, прянзо алов нолдызе, кудрятне новольсть прястонзо.
— Чокшне кото часосто тейдянок промкс.
Филя стясь, куратной рунгозо рисмекс видемсь Катянь икелей, венстизе Катянень кедензэ, Катаяк стясь, лиссь ильтемензэ.
Катя совась кудов, комась вальмантень ды вансь Филя мельга. Филя ёмась сельмстэнзэ вирь чирентень. Катя прок кельме ведьс чопавтсь. Прязонзо каявсть мень бути думт: появи икелензэ Филя, совхозось эци сельмезэнзэ, эли заведующеесь боцька пекензэ марто сёвнозеви.
21
