nun ho valur pratica. Cò pudessas render ün vair servezzan eir a noss chers trapassos, impè da fer experimaints chi nu velan üna pipa tabac.»
Eau eira persvas da l'avair do üna, ma üna in uorden e nu füt poch surprais da vair ch'el, tuot oter cu imbarazzo, am respuondet in riand da cour:
«Mieu cher Gian, ünguotta pü facil cu que. Ma scha't quintess ch'eau d'he agieu comunicaziun cun Maschel Zaccaria barmör e cun oters, e cha tuots m'haun quieto e dit, cha la colonia ladina in tschêl nu piglia la chosa uschè stip, nun am crajessast istess brich. Tü est, Dieu ludo, tuottüna surour quistas chosas da narramainta!»
Sieu tun ironic am laschaiva in dubi, sch'el dschess tuot be per spass o sül seri e per nu perder üna clappa, chattet eau per bön dad imiter sieu exaimpel.
«Chi so,» dschet eau in l'istess tun, «chi so, ad esser forsa preschaint ad üna da quistas conferenzas cun tieus spierts am persvadess, pustüt scha mieu anim e mieu cour gnissan alura a pos in quista melprüveda fatschenda. Dal rest vain pretais, cha vossa scienza müravgliusa fatscha da di in di pü grands progress. I'm pera d'avair let ünzanua, cha nun avais pü da citer singulas ormas sün quista povra terra, ma schi stu esser pudais dafat transferir voss egens spierts in quels lös, inua dolur e led nu sun cuntschaints?»
«Tschert,» replichet el, «ed in quist cas valess que la paina dad udir il parair na be da Maister Zaccaria, ma eir da noss oters buns ladins barmörs. Ninà? Be nu sè, scha las instanzas celestas permettessan l'admissiun d'ün barba melcrettaivel scu tü. Pür memma craj eir eau, cha a glieud da tia spezcha füssa pcho ed inütil da conceder tela grazcha. Be pregüdizzis, scu cha vus essas, nun bastessan neir quistas provas, güsta uschè poch scu las otras, per as delibrer da vossas prevenziuns.»
«E pür, eau provess,» dschet eau in riand, «che nun as fo tuot per servir a la buna chosa. U hest forsa temma, cha la prova nu gess tenor giavüsch?, hahaha ...»
In quist tun ans zaclinettans ed ans dantigliettans auncha per üna bun' uretta, passand lura cun noss discuors sün otras fatschendas, fin cha cun ün cordiel «buna not» ans separettans per ir a cuz. —
