katekkan saddjhăna, băḍă sè enten, noro' bărămma tja'na papasţènna bi'-dhibi'. Sakabbhiǎnna ḍhoekon, bhoedjoe', karamat pon paḍă èèntarè bi' boelă. Ḍoe ḍimma, na, băḍă orèng ta' terro soghiă, ka'?"
Anangèng palang ongghoe abǎ' boelă nèko, marghǎ taker sanonto ghi' ta' tao ètapak rassana soghi."
Ma'na Iddris: „Padjhăt tjè' rangrangnga orèng sè napa' ka saddjhăna. È dhisa ḍinto sè katekkan ka saddjhăna, nèng haddjhi Djoenos băn maʼna Sarpan. Kabărră, ghoeroena haddjhi Djoenos è Tjarebbhoen (Tjirebbon); ghoeroena ma'na Sarpan orèng koṭṭa, anjama Mas Tèrta."
Haddjhi Băkkri: „Mon ongghoe aghoeroe ka rèng Tjarebbhoen, patot lombhoengnga kan possa' bi' paḍi bhăi.”
Mordăne: „Anangèng kaoelă, mas Towan, mon ènga' pas terro aghellǎ'a. Ghi' dhingèn, nalèka kaoelă ghi' ngoḍă, tjè' terrona ongghoe dhǎddhiă orèng sè senneng oḍi'na; maskè ta' soghi, sokkor ta' talèbăt sossa saos tja'na atè, kaoelă ampon anjama senneng. Orèng towa kaoelă aparèng sabă ra-kèra ḍoewǎ bhǎoe, mattowa aparèng satengnga bhǎoe. Sabǎ ka'into pas paḍă èpandjhă'i paḍi sadhădjă. Saamponna marè anjè, kaoelă kèngèng naro paḍi ḍoe amet[1], karèna èngghi èpanjerra otang, nalèka abhoektè sabă.”
„Saamponna angghǎpanèka bhădhăn-kaoelă pas kèngèng pangghoeḍhăna Norhadi, bhădhăn kaoelă èadjhăk èntar ka Paghellărăn, parlo njarea rat-saratta orèng terro soghiǎ. Tja'na èangghăḍijă băḍă bhoedjoe' karamat, tor sè adjăgă dhoekon kasorang sè andi' èlmo kasoghiǎn.”
„Tja'èpon, tjè' bănnja'na orèng sè aghaghoeroe ka angghăḍijă. Ènalèka angghǎpanèka djhoeghan bhadhăn-kaoelă pas adjhoewǎl paḍi lèma pèkol, parlo èkasangoa. Saollèna pèssè, bhadhăn-kaoelă pas dhoeli mangkat asareng Norhadi. Dhinèng padjhălănan angghǎpanèka ongghă toron è ghoenong. Pya, manabi lessona ampon ta' matora. Anangèng kalabăn kabellăsanna Ghoestè sè morbhă djhăghăt, kaoelă sasarengngan èngghi èparèngè napa' ka kennengngan sè èsaddjhă, èngghi bhoedjoe' karamat ghella'. Anangèng bhǎdhăn-kaoelă ta' ladjhoe terros è bakto ka'into djhoeghăn, marghă ampon djhă' arè. Mèlana pas jo'on èdhi ka padjăgăna, sopadjă bhădhăn kaoelă sabhǎreng èlèllanana ngènep è bengkona.”
„Katjatora è bădjă malem, bhadhăn-kaoelă pas ètanja'aghi sareng patoghoena; panapa saddjhǎ bhădhăn-kaoelă sè èntar ka angghăḍijă. Bhadhăn kaoelă pas abălă dhoe bhăḍḍhǎk, djhǎ' taḍă' laèn sè èsaddjhă, kadjhăbhăna terro soghiă.”
- ↑ saamet= 100 tangghǎpan. S. S.
