ÈLMO KASOGHIĂN.
BHĂB SÈ KAPÈNG SÈTTONG.
Tjatjana pan-bărămpan orèng dhisa.
Haddjhi Băkkri: „Bhă anapèa kérana, ma' boelă băn dhika kabbhi nèko padă èdhikanè kalèboenna?".
Pa' Moerdǎni: „Mon boelă ta' sala pangèḍing ma' masè polana bădă'ǎ kompolan."
Haddjhi Băkkri: „Kompolan napè kèrana? Pola mè' kompolan ansla'an [1] otabǎ kompolan lombhoeng dhisa?"
Pa' Moerdǎni : „Pon bikan ka, boelă ta' tao sè ra'-ngèra'a."
Iddris: „Mon noro' pangèḍing boelă, tja'na akompolana bi’ Mantrè-tanè."
Haddjhi Bǎkkri : „Sapa Mantrè-tanè nèko? Napè orèng atata-nén èpasangè mantre? Saddjhegghă boelă oḍi' ghi bhoeroe sakalèan nonto ngèḍing njama ghănèko; boelă nèng ngèḍing orèng ngotja': orèng tanè."
Iddris: „Padjhăt engghi; anangèng sè èkotja' orèng tanè nèko, orèng tjara boelă băn dhika, sè pangorèpanna atatanèn (abhoektètana)."
Haddjhi Bakkri: „Engghi padjhăt tjara ghănèko. Nangèng otja'„Mantrè-tanè" boelă ghi' bhoeroe tao ngèding sanonto ongghoe."
Djhoertolès : „Saongghoena ta' patè kappra orèng ngotja' Mantrè- tanè, akappra'an „Mantrè-landbouw”, sabăb orèng sè ngotja'tjara ghǎnèko nèng malar ghămpangnga."
Haddjhi Bǎkkri : „Pya, ghoen-engghoenna djhăman achèr, ma' amatjem-matjem sakalè ; bărnana pangkatta orèng aboe-èmboe bănnja'na. Pangkat ghǎnèko napè pon abit sè băḍă?”
Djhoertolès: „Enten, ghi' bhoeroe ḍoe taonna sanonto.”
Haddjhi Bǎkkri: „Ponapa lalakonna Mantrè-landbouw ka'into?"
Djhoertolès: „Tja'na kabăr taḍă' laèn lakona, kadjhăbhǎna marèksa bă-sabă băn bhoen-kebbhoen.”
- ↑ Ḍări otja' Bălăndhă „aanslag", artèna : naksèr padjhek
