Ostpreussische Sagen und Schwänke/Blos engeseept!

Ön enem Gasthus awends huckte
Dre Reisende tosamme enst,
So wie gedruckt se alle loage
Von dem Geschäft on dem Verdeenst.

[063]De ene moakt ön kölnisch Woater
On schöne Aßmannshauser Wien,
He wär e ganz geräthnet Luder,
To Hus natürlich ön Berlin.

De zweiter reiste ön Cigarre
On had e afgebröhgde Sönn,
Wurd he von vöre rutgeschmäte,
So keem er hinde wedder rön.

Dem drödde, enem Königsberger,
Söch jeder gliek als Ostpreuß an,
Ön Striekhölske on Mostrich moakt he,
Wär enfach, doch e witz'ger Mann.

Als se sick möd geräubert hadde,
Schlog man e Kartespeelke vör,
E Schkoat möt Winke on Bemogle,
Weil de recht underholend wär.

Dat Speel ging los; de Königsberger
Vertog nich enmal ene Mien,
Ful grimmig rön on had verloare
Noah ener Stund dre Buddel Wien.

„Das war ein Spaß!“ meent drop de Bremer,
„Wenn einer wird so angeführt!“
De ut Berlin seggt tom Geprellte:
„Bedaure Freund, Sie sind barbiert!“

De Ostpreuß ärgert sick nich wenig,
Betoalt on ös dabi ganz stöll,
Doch denkt he sick: na wacht, Hallunke,
Daför öck ju schon kriege wöll.

[064]Am nächste Morge lätt er koame
So'n röcht'ge Windhund von Barbör,
Göwt dem e Opdrag, stellt sick demnächst
Vergnöglich hinder siene Deer.

In disser Tied läg de Berliner
Fest schlapend noch ön sienem Bedd,
Öm Stowke nebenbi de Bremer
Schnarcht höllisch möt em om de Wedd.

Bi dem Berliner kloppt de Windhund
Erscht leise on dann stärker an,
Op dat „Herein“ geit he önt Tömmer
On fragt, ob er barböre kann.

„Na meinetwegen,“ seggt de Koopmann
On röchtet ön dem Bedd sick op,
Geschäftig de Barbör gliek loslägt,
Schleit Schuum on seept em ön dem Kopp.

Dann seggt he: „Ach Herrjeh, dat Messer!
Öck häbb't vergäte,“ geiht stracks rut,
Moakt ewenso dann bi dem Bremer,
Als engeseept ös dem sien Schnut.

Beröchtet nu dem Königsberger,
Von dem he gern e Doaler nömmt,
Bedankt sick schmunzelnd, tit de Angströhr
On göwt dann schleunigst Fersegöld.

Et duurt nich lang, kömmt de Berliner,
Kickt rut ganz nackt, schriet: „He, Barbier!“
Öm Ogenblöck kömmt uck de Bremer,
Kloagt: „Eben war er auch bei mir.“

[065]De Ostpreuß stellt sick zwöschen beide,
Seggt ruhig: „Dat wär angeföhrt,
Ick häbb' ju blos enseepe loate,
Barböre häbb ick nich gelört!“