Ona scimbia
Ona scimbia
[edit]’Na scimbia in la gabbionna di Giardin
l’era lì da on bell poo a vedè la gent
che, ferma, la rideva a guardà dent.
L’ha vist ’na sciôra con sù on cappellin
che per ’na scimbia l’era on vêr modell,
el ghe podeva andà proppi a pennell;
l’ha vist ona popôla smorfiosinna
a tirà foeura da la soa borsetta
– istess come pò fà ’na scimbietta –
on speggettin e a dass ’n’inzipriadinna,
e a peluccass i zili a sôra i oeucc,
come ona scimbia quand la cerca i pioeucc.
L’ha vist poeu dùu morôs sott’a brazzett
a fà cinâd e, intant che limonaven,
besognava vedè come scisciaven,
quij dùu giavan, on pirlo de sorbett;
l’ha vist on vècc tutt seri adree a nettà
la soa pipetta, e l’era in gran defà...
A quella scimbia gh’è vegnùu la rabbia
vedend sta gent che ghe rideva adree,
e la s’è domandada intra de lee:
«Perchè sto rîd?... Perchè m’hann mettùu in gabbia,
vist che con quij de foeura, o porca l’occa,
de differenza ghe n’è minga o pocca?...»