Ona sanguetta
Ona sanguetta
[edit](dagli «Apologhi» di G. Capasso)
Dopo on ann che a l’ospedaa
la faséva – ona sanguètta –
i servizzi ai ammalaa,
l’è tornada a la ronsgètta
in del sît doe l’è nassùda,
in del foss doe l’è cressùda.
E rivada al sò fossètt
la finiva pù de dì,
de cuntà a tutt’i sanguètt
quell che l’ha vedùu a patì.
Oh Signôr, quanti miséri,
che dolor, che tribuléri!...
Ma on’amìsa in del vedella
bella grassa prosperôsa,
la gh’ha ditt: «Porca sidella,
sti dolôr, o cara tôsa,
dopo tutt, và, lassom rîd,
ah, t’ie-t digerii polît!...»